Jael Leito, Zoe Eman y Chrislaine Paul, ken ta studiantenan di Economia na Colegio EPI a presenta nan proyecto final, cual ta trata di e creacion di un website pa e Fundacion Contra Cancer di Prostaat Aruba, algo hopi necesario manera a sigura pa asina comunidad por cera conoci cu e fundacion y kico nan ta haci.

Ayera merdia na Auditorium di Colegio EPI studiantenan di vierde klas a presenta nan ultimo proyecto final unda nan a scoge e Fundacion Contra Cancer di Prostaat Aruba cu pa nan manera Leito a sigura “nos a scoge un fundacion cu no ta hopi conoci na Aruba” na unda e tres studiante a reuni cu miembronan di e fundacion Cesar Angela y Milo Croes caminda a bin dilanti kico tabata e necesidad di mas grandi y nan deseo cu e fundacion tabatin na e momento ey pa asina ey nan como studiantenan por cumpli cu esey.

Miembronan a informa cu e deseo di mas grandi tabata pa nan por haya un website pa e fundacion na unda studiantenan a logra recauda fondonan di diferente sponsor pa por a haci e website cu ta dedica na e fundacion pero pa nan tambe como studiante “y specialmente pa conscientisa hende homber na Aruba pa nan preocupa pa nan salud, pa nan haci nan test, pasobra nos sa cu cancer di prostaat ta algo hopi importante y p’esey nan como fundacion kier yuda e comunidad, informa y educa e hende hombernan pa nan sinti nan mes liber pa por acerca nan pa cualkier pregunta.” Leito a sigura.

Pa busca mas informacion por bishita e website www.prostaataruba.org unda por haya e frase di bonbini “mas di 90% di tur cancer ta curabel, si e wordo detecta na tempo” eynan tambe tin diferente contenido como blogs, campañanan, seccion tocante cancer, tratamento, kico e malesa aki ta encera, Leito a sigura cu esaki ta e parti di mas importante pero tambe publico ta cera conoci cu e fundacion tambe pa e comunidad haya sa di e fundacion, kico ta nan meta y nan vision.

Fundacion Contra Cancer di Prostaat Aruba
 Aruba tin diferente fundacion cu ta enfoca principalmente riba problemanan di salud di hende muhe of cu tin iniciativanan specifico cu ta dirigi riba yudansa na muhe cu cancer. Ningun fundacion a dedica nan mes efectivamente na trata problemanan di salud di homber, particularmente cancer di prostaat. Pa e motibo aki, Fundacion Contra Cancer Di Prostaat (FCCP) a wordo estableci.

Fundacion Contra Cancer Di Prostaat a wordo funda na aña 2012.  Rudy R.  Rodriguez tabata e fundado y prome presidente di FCCP. Lamentablemente Rudy a fayece den su lucha contra cancer di prostaat na October 3, 2014. Su lema tabata: ‘Ami tabata laat. Mi no kier pa otro ta!’

E metanan principal di nan ta pa duna informacion y recursonan di sosten pa pashentnan cu cancer di prostaat, nan famia y amigonan, ademas nan ta yuda hombernan compronde e malesa complica y compleho aki cu ta ser haya den hende homber so, nan ta purba di promove e salud di e pashent cu tin cancer di prostaat, nan ta duna sosten emocional, conscientisa, stimula fe y speransa na esnan cu tin cancer y nan sernan keri y nan ta duna testimonio pa pashentnan.

Pa hombernan na Aruba, no ta facil pa papia abiertamente tocante e topico aki. hopi di nan ta sinti nan mes decepciona of preocupa ora e topico ta sali dilanti, pa e motibo ey, ta hopi esencial pa hombernan crea un espacio unda nan por expresa nan mes na un manera comodo sin sinti nan mes vulnerabel.

Ademas, a splica cu e fundacion ta purba di contribui na e comunidad door di yuda kibra e barera di miedo of e taboo na Aruba pa haci test, pa busca tratamento pa malesanan cu ta concerni na cancer di prostaat.

Nan grupo meta ta tur hende homber cu awor ta sufriendo e malesa di cancer di prostaat y tur homber cu no sa cu nan tin e cancer aki, p’esey nan ta pidi pa haci e test PSA.

Cu charlanan, entrevistanan, campañanan y guia personal nan ta guia e hende homber ora ta presenta algun duda of kier haya mas informacion tocante e tema relevante aki.

Kico ta cancer di prostaat?
 Cancer di prostaat ta surgi ora cu celnan abnormal ta forma, ta crece y ta desaroya den e prostaat. Cancer di prostaat por ta mortal si e plama for di e prostaat. E causa di cancer di prostaat no ta conoci ainda, pero cierto factornan cu por hisa bo chens di haya cancer di prostaat ta edad, cancer den famia y rasa.

E malesa aki ta uno cu no ta duna ni un tipo di sintoma, solamente den un estado hopi avansa e por causa dolor di weso of problema di orina. Sinembargo, si e persona no tin ni un sintoma di orina, check cu un test PSA unabes pa aña. Cuminsa cu esaki ora edad ta 50 aña bay ariba of cu 45 aña bay ariba, si tin cancer den famia. Si a bay cerca dokter di cas cu sintomanan di orina, doctor di cas lo check un PSA.

E test specifico antigeno di prostaat of PSA
 E nivel normal di PSA ta considera bou di 3 nanogram pa mililitro(mg/mf) di sanger. Si e PSA ta mas cu 3.0, esey no kiermen ainda cu bo tin cancer di prostaat, pero esey kiermen cu bo por tin prostatitis, prostaat grandi of hincha y tambe cancer di prostaat. Ta hopi importante, pa bo check cu bo doctor di cas, ademas di e test aki tambe tin e Digital Rectal of DRE.

Pa finalisa, ta importante pa destaca cu prostaat ta den e top 3 di cancernan na Aruba, e casonan nobo di cancer di prostaat diagnostica den aña 2010 tabata mas cu dobel na 2007, e cifranan aki lo ser actualisa den transcurso di lunanan manera Leito a informa.