Fundacion CineAruba despues di a entrega un aplicacion pa subsidio na gobierno anterior, actualmente ta sperando riba un contesta riba e aplicacion cu nan a entrega di nobo na gobierno actual. E fundacion ta traha proyectonan relaciona cu trahamento di peliculanan y tambe pa conscientisa uzando films. Semper e fundacion ta boga pa trata por medio di films problemanan social, envolviendo di e manera aki creatividad, cultura y enseñansa.
Segun Juan Francisco Pardo, artista local y coordinado di proyecto na Fundacion CineAruba ta splica cu aunke e fundacion a cuminsa cu un enfoke cultural, esta trahamento di films na Aruba, poco poco a bin realisa cu nan trabou ta encera aspectonan mas amplio. Mas aleu cu e sector cultural cu ta envolvi den crea pelicula, e fundacion ta traha den tereno social por medio di envolvi hobennan cu normalmente no lo tin nada pa ocupanan pafo di oranan di scol. Alabes ta traha riba proyectonan unda hobennan y participantenan den entre otro tayer ta haya chens pa siña tecnicanan envolvi cu trahamento di films. Personanan cu a colabora cu e fundacion den pasado te hasta a bay studia filmmaking den exterior, segun sr. Pardo.
CineAruba ta enfoca riba hobennan pasobra nan a bin ta realisa cu tin hopi fundacion y instancia cu ta traha pa hobennan- cual ta un bon echo, segun sr. Pardo- pero poco ta traha cu e hobennan mes. En particular sr. Pardo ta haya cu riba desaroyo di e identidad di e hobennan adolecente tin hopi di desea.
“Tin hopi confusion y insiguridad bou hobennan. Eynan nos ta bin y nos ta duna proyecto creativo y esaki ta un medio cu nan por uza pa desaroya riba e aspecto social y intelectual. Por ehempel den nos proyectonan di actuacion nos ta nota cu den cuminsamento nan ta hopi reserva pero despues di participa ta bira mas habri.”
450 hoben a participa anteriormente cu Abo So
E fundacion desde 2010 ta existi y ta trata di fomenta proyectonan multidisciplinario, manera e proyecto den 2013 Tribi soño, cual a culmina den nan proyecto Abo So. Ta trata aki di un proyecto cu a envolvi mas o menos 450 hoben cu e diferente discipinanan: baile, canto, musica y filmmaking. “Hopi di e hobennan cu a participa a haya un bista riba kico nan lo kier haci den futuro. Apart di esaki hobennan cu tabata den situacion fastioso ta bira mas positivo. Basicamente nos ta wanta nan for di caya y nan ta siña nan algo positivo cu nan por aplica den nan bida laboral y profesional.”
Un punto en particular cu hobennan ta desaroya durante e proyectonan di CineAruba ta e aspecto di team building, segun sr. Pardo. Durante e tayernan hobennan ta haya chens pa desaroya nan comunicacion, cual ta un di e rasonnan cu hobennan na Aruba tin dificultad pa enfrenta problemanan cu ta presenta den nan bida, segun sr. Pardo.
E aspecto di por trata problema social pa medio di desaroya hobennan su talentonan manera sr. Pardo a menciona ta un manera con por evita cu hobennan ta bay den caminda robes. Manera Stichting Reclassering a menciona anteriormente den un entrevista cu Bon Dia Aruba, e situacion cu hobennan ta enfrenta ora ta bin den problema cu husticia ta hopi biaha pa via di problema social y e manera con hobennan no tin actividadnan pa haci pafo di scol.
Nos lo elabora mas riba e retonan financiero cu e fundacion ta enfrenta y tambe bay mas den detaye riba e proyectonan cu e fundacion a ehecuta y ta trahando riba dje den nos proximo edicion.
