Fundacion CineAruba den aña nobo ta spera cu gobierno lo duna contesta riba nan peticion pa subsidio di gobierno. E fundacion ta enfrenta dificultadnan structural pa traha nan proyectonan na tempo pa via di e problemanan financiero. E fundacion su meta ta uno tanto cultural como social y educativo.
Manera nos a bin ta raporta ultimo tempo, e fundacion CineAruba ta wardando cu pasenshi pa gobierno nobo trata nan aplicacion pa subsidio di gobierno. Juan Francisco Pardo, coordinado di proyecto na e fundacion, ta conta Bon Dia mas den detaye dicon nan como organisacion ta buscando financiamento di parti di gobierno pa nan proyectonan. CineAruba ta enfoca manera nos a menciona den pasado riba fomenta proyectonan di film cu ta envolve hobennan en particular pa asina yuda trece un cambio den situacion social y profesional di hobennan desde 2010.
E proyectonan cu e fundacion ta ehecuta ‘hopi biaha ta proyecto grandi cu ta tuma par di aña pa finalisa’, segun sr. Pardo. Pues e fundacion ta purbando di yega na fondo di otro manera pasobra pa 1 of 2 aña nan mester keda busca fondo pa asina haci e proyectonan largo aki posibel. “Si nos lo tin acceso na fondo den menos cu un aña e proyectonan aki lo bay mas lihe. P’esey mes nos no por haci hopi di e proyectonan cu nos kier haci pa aña. Nos ta limita pa cada 3 aña por ehempel ehecuta un serie of un pelicula hunto cu hobennan.”
Aunke nan acceso na fondonan ta basta limita, e fundacion sinembargo ta gradici cu nan a haya financiamento di parti di Fonds voor Cultuur Participatie di Hulanda, Unoca Aruba, Prins Bernhard Cultuurfonds Caribisch Gebied y Vertegenwoordiging van Nederland in Oranjestad (VNO) sea actualmente of den pasado.
Fondonan no ta multiplica, si no bira menos
Na mes momento e fondonan cu e fundacion a haya den nan experiencia, despues di tempo, no ta bira mas si no menos. Pues di e prome proyectonan cu fundacionnan ta aplica pa fondo, esaki lo ta esunnan cu semper ta ricibi mas, birando menos despues di tempo.
Mas aleu e proyectonan cu CineAruba a yega di ehecuta no ta haya tur e fondonan cu nan ta pidi pe pasobra e criteria di e instancianan ta ‘ful diferente cu nos proyecto’. Un ehempel cu sr. Pardo ta duna ta cu pa filma pelicula of short films, e fundacion tin cu pidi subsidio pa catering. Esaki ta pasobra hopi biaha actornan ta haci e trabou por nada, pero e fundacion tin cu compensa nan sikiera cu algo di come ‘pasobra si un hende ta traha gratis pa bo, bo tin cu trata nan bon si’. Pues den e caso aki e fundacion no a sigui haya acceso na fondonan pa catering despues di tempo.
Apart di esaki e fundacion ta haya dificultad pa por financia e aspecto di escenografia cu ta masha importante pa por traha pelicula di tur tipo, segun sr. Pardo. “Bo tin cu pensa cu un pelicula ta un pintura cu e pintor tin cu pinta su escena riba dje constantemente, cada seconde. Dificilmente nos ta haya fondo pa asina tin un escenario adecua of cosnan pa yena escenario cu ne.”
Esaki ta importante pa e fundacion por crea pelicula cu audiencia por conecta cu ne. Di e manera cu e situacion di fondonan ta bayendo, lo e fundacion posiblemente tin cu cuminsa traha filmnan un poco mas abstracto cu publico y audiencia dificilmente lo conecta cu ne.
E fundacion mas cu cla tambe tin dificultad pa haya fondo pasobra ningun di e instancianan local, y poco di e instancianan internacional ta otorga fondo pa proyectonan di film specificamente. Pues ta asina cu cada instancia ta label e proyectonan di e fundacion di tal manera y tur ta haci esaki di manera diferente. Pero sr. Pardo ta conta nos cu e CineAruba su proyectonan ta cay den diferente categoria di proyecto, sea educacional, cultural, social of posiblemente documental.
Pa por logra trece un mehoracion den e situacion cu e fundacion ta enfrenta pa loke ta trata fondo, CineAruba ta purbando aplica pa subsidio di gobierno. Esaki no a keda trata pa gobierno anterior pero nan a bolbe entrega aplicacion na gobierno nobo pa esaki no bay perdi.
Envolve comercio mas
Pero alabes e fundacion ta bogando pa comercio tambe ta mas envolvi cu e proyectonan cu e fundacion ta ehecuta. Television en particular a bira un bentana pa comercio unda cu ta uza esaki como tele tienda. E product placement aki ta encera entre otro cu ta filma television of otro medionan audiovisual den cierto tiendanan cu ta sponsor e produccion. “Di e manera cu e comerciante ta wak e actualmente, si nos acerca nan pa un sponsorship a base di pone un comercial den un di nos produccionnan, nan lo bisa cu no.”
Segun sr. Pardo, comerciantenan awendia tin expectativa cu den e produccion mes lo mustra e tienda of producto di e comerciante. Esaki por mira tambe como desaroyo den peliculanan di por ehempel Hollywood unda e productonan cu ta wordo placed ta marcanan grandi.
CineAruba no ta traha riba proyectonan solamente pa traha film, si no nan ta haya cu traha cu hobennan ta algo particularmente importante pa hobennan cu ta cay den depresion pa via di no tin nada di haci. E fundacion ta spera cu por medio di nan proyectonan, hobennan ta realisa cu nan tin algo pa biba pe. Segun sr. Pardo, e fundacion a te hasta yega di enfrenta hobennan cu pensamento di suicidio. Pero hopi biaha esaki ta algo cu e fundacion ta yuda cu ne, por medio di envolve otro hobennan, crea un sintimento colaborativo y desaroya e habilidadnan di e hoben.
Un comentario cu sr. Pardo a duna ta cu e no sa si e condicionnan cu tin pa aplicacion pa subsidio di gobierno a cambia ora gobierno nobo a wordo instala. P’esey mes el a entrega e aplicacion di nobo. Nos lo tuma contacto cu e departamento concerni pa clarifica kico ta e diferencia entre normanan y exigencianan anterior y esunnan nobo pa subsidio.
