Ayera tardi Fundacion Chico Harms a tene un conferencia di prensa na unda e directiva di e fundacion, sr. Chico Harms, sr. Leo Harms y sr. Tito Tromp, a duna un splicacion amplio di e tur e actividadnan cu ta bay tuma luga en conexion cu e di 11 edicion di celebracion di Dia di Brazil 2023.

Sr. Chico Harms a a splica cu e prome actividad oficial pa aisna inicia oficialmente e schedule di celebracion di Dia di Brazil ta bay tuma luga dia 28 di mei, cu lo ta e parada acustico. E parada aki lo ta saliendo pa 4:30 di atardi for di misa na Brazil direccion pa Centro di Bario Brazil.

Dia 24 di juni, manera ta conoci ta dia di fiesta di San Juan y pa mantene e cultura bibo pa e fiestanan aki Fundacion Chico Harms ta haci nan esfuerso pa mantene nan na bida y pase pa e siguiente generacion, e hobennan.

Pa celebracion di dia di San Juan, Dear Gai manera ta custumber ta bay tin actvidad na Centro di Bario Brazil. Riba e dia aki, sr. Tromp a splica, ta bay tin premio pa e bailadornan, tanto hoben como adulto.

El a agrega cu nan ta hopo contento cu e ultimo añanan nan por a nota cu tin hopi interes di parti di mucha pa cu esaki. “Esey ta bon pasobra esey ta garantisa cu nos tradicionnan lo sigui pa e proximo generacionnan,” el a remarca.

Riba dia 29 di juli tin e actividad Cantica di Caya pa cual ya caba tin shete grupo cu a confirma nan participacion. Ultimo dia pa inscribi pa e evento aki ta dia 24 di juni. E aña aki mescos cu e añanan anterior, sr. Chico Harms a indica, tin tres categoria, infantil, hubenil y grandi. El a agreag cu si acaso tin hopi participante den e categoria infantil y hubenil, ta trece cambio y ta haci e evento dos dia.

E categorianan di musica cu ta permiti pa canta e anochi aki ta tumba, dansa, calypso crioyo y tambu.

Riba 19 di augustus durante e actvidad Batacaso Tipico, e finalistanan di Cantica di Caya lo bin hunto pa asina presenta un fiesta bailable pa e bario di Brazil y Aruba completo.

Sr. Leo Harms a elabora ariba e anochi di coronacion di e reinanan folklorico cultural cu lo tuma luga dia 26 di augustus. El a splica cu tin shete categoria cuminsando for di categoria baby te na gran dama cultura y alabes lo corona tambe e pilar cultural.

E coronacion di e pilar cultura ta tuma luga tur aña na unda ta corona un persona grandi, adulto mayor, cu a destaca pa hopi aña den e mundo cultural y cu a haci hopi cos pa cultura di Aruba. Esaki por ta den cualkier ramo cu tin di haber cu cultura, pero e ta persona cu ta participa den hopi actividad cultural.

E show di e anochi aki ta cumisna pa 7:30, cada candidata ta haci un presentacion relaciona cu culutra, por ta baile, comedia, entre otro, pero e mester ta algo cu ta mustra kico Aruba tin y kico e folklore y cultura di Aruba ta.

E aña aki, sr. Harms a indica, atrobe a opta pa no haci eleccion, pero mas bien haci coronacion. Durante e prome reunion cu tur e gruponan cu ta participa den parada e fundacion a puntra kico nan ta prefera, haci eleccion apart of di cada grupo cu ta participa tin un reina den parada y ta haci coronacion y na final nan a opta pa esey.

Cada grupo mester scoge un categoria y apunta e reina cu lo representa nan grupo y cu lo wordo corona den e categoria cu nan a scoge.

Dia 1 di september ta tuma luga e conocir Parada di Lanterna. Esaki, sr. Tromp a splica, ta duna oportunidad no solamente na e gruponan, cu ta inverti hopi placa, pa nan por usa nan trahenan mas, pero ta duna oportunidad tambe na pueblo pa esnan cu no por wak e parada culutral diadomingo den dia, nan por wak e diabierna anochi.

Durante ultimo añanan, el a remarca, e Parada di Lanterna a haya hopi acogida, principalmente pasobra e ta atardi laat pa anochi, cu ta mas fresco.

Pa esnan cu ta participa den e parada di lanterna, ta importante pa enfatisa cu esaki ta cu lanterna y no cu flashlight of otro tipo di luz.

Ariba dia 2 di september, manera a cuminsa aña pasa, e aña aki tambe tin e actividad di show di tambu y ya caba pa e aña aki tin cinco grupo di tambu cu a inscribi pa participa den e actividad aki.

Dia 3 di september ta e dia di e gran parada cultural. Sr. Chico Harms a splica cu pa tur dos parada cultural tin un total di 11 grupo inscribi, cuater miniteca y seis banda y el a subraya cu ta mustra cu e aña aki ta bira mas grandi pa motibo cu e scolnan di bario di Brazil tambe ta bay participa.

“Nos a haci un peticion na otro scolnan tambe pa nan participa pasobra aki poco tempo ta nan ta esunnan cu mester dirigi nos parada,” el a enfatisa.

Sr. Tromp a agrega cu como fundacion nan ta mira cu tin interes di parti di e scolnan pa e parada cultural y esaki sigur ta algo cu nan ta aplaudi. El a splica cu durante pandemia nan a perde hopi participante pasobra tabatin hopi grupo di hendenan di edad halto y tin grupo cu a hasta stop di existi mes.

Di otro banda, el a resalta, cu e ta duna nan hopi satisfaccion pa mira cu tin varios hoben ta participando den e actividadnan. “Esey ta garantisa cu e futuro di nos tradicion lo sigui,” el a bisa.

Un actividad nobo cu e fundacion a introduci e aña aki den nan celebracionnan pa Dia di Brazil, cual ta tuma luga dia 29 di october, ta e actividad di feria di cuminda multiculutral. Tromp a indica cu nan kier trese mas evento cultural pa Aruba y esaki ta unda pueblo di Aruba por siña conoce y aprecia cultura di otro paisnan cu ta forma parti di e comunidad di Aruba.

Durante e actividad aki ta bay tin show multicultral cu trahenan tipico di e diferente pais cu ta forma parti di e comnidad di Aruba y ta bay tin cuminda tradicional y popular di cada pais.