Diabierna ultimo, Fundacion Centro Famia Piedra Plat a presencia e famoso y espectacular show di Rhythms Circus Company Aruba, y asina a conclui un siman di actividad pa muchanan.

Bon Dia Aruba a combersa cu Adriaan Berg, presidente di e fundacion, kende a conta cu durante temporada di vakantie e fundacion tin campamento y e aña aki nan tabatin dos campamento. E prome tabata pa muchanan di edad 5 pa 8 aña y e di dos di 9 pa 12 aña, anto riba diabierna a reuni e dos grupo aki hunto pa finalisa nan programa di campamento pa wak e emocionante show di RCC Aruba. E show tabata gratis pa e muchanan, y e mayornan di e muchanan tambe por a compaña e muchanan pa presencia y disfruta di e show na un prijs special.

Den e prome campamento nan tabatin 25 mucha, y den e di dos 30 mucha, pues 52 mucha total, cu un averahe di 12 lider cu a yuda boluntariamente durante e campamento.

Berg a conta cu e campamento tabata cu enfoke riba e parti di arte, musica y recreacion. Tur dia tabatin un artista invita cu a presenta su mes – sea den musica, canto, arte, pintura – y asina tur dia a haci un actividad diferente.

Scol di musica

Berg a conta tambe cu e fundacion tin un scol di musica cu yama Cas di Musica, cual su logo ta un cas antiguo di Aruba, ya cu unda e scol ta situa ta na un cas cu tin 115 aña bieu. Enfasis di Cas di Musica ta pa siña mucha, hoben y hasta adulto tocante musica. Nan ta duna les pa instrumentonan manera piano, guitara, baho, drum, cuarta y canto, en total seis, y nan tin un averahe di 50 studiante. E scol ta draai di dialuna pa diasabra.

“E ta un scol completo, pasobra den nos area unda nos ta – Piedra Plata, Paradera y Santa Cruz – no tin hopi scol di musica. Cerca nos e muchanan por bin desde 6 aña, pasobra e muchanan mester por cuminsa lesa, pasobra mester lesa e notanan,” Berg ta conta. “Y nos tin alumnonan di 6 aña, y tin alumno cu ta tuma les di cuarta cu tin 80 aña. Kiermen e famia completo por bin tuma les cerca nos.”

Fundacion Centro Famia Piedra Plat
 Berg ta conta ademas cu e fundacion ya tin 15 aña exactamente desde cu a keda funda oficialmente na notario, pero e proceso mes a tuma su tempo. Apart di e scol di musica nan tin tambe un programa traimerdia pa muchanan di educacion basico y avansa. Esaki ta di dialuna pa diahuebs, di 1or pa 5or di atardi. “E no ta un opvang den e sentido cu e mayornan ta trece e mucha pa nos wak pa nan,” Berg ta aclaria. “E enfasis ta cu nan ta haya huiswerkbegeleiding. E muchanan cu ta bin cerca nos ta pa nan haya ayudo cu nan tareanan di scol.” Aki tambe e fundacion ta conta cu docentenan boluntario. “Nos enfasis ta pa muchanan di menos recurso,” Berg ta bisa, “pero nos ta habri tambe pa tur otro mucha y famia cu por bin. Pero muchanan di menos recurso ta haya un prijs reduci.” El a bisa cu danki na sosten di CEDE Aruba por mantene e prijsnan social.

“Como fundacion nos no ta un negoshi, nos no ta draai pa gana placa,” Berg a bisa. “Pero automaticamente nos tin cu cubri nos gastonan si – coriente, awa etc. Nos tin tres persona den servicio, cu ta e coordinador di tur e programanan cu nos tin, e director di e scol di musica, y tambe un werkster cu ta haci limpi.” E tres persona aki ta trahador full-time, y tur otro ta boluntario.

Pa mas informacion por tuma contacto via pagina di Facebook di Fundacion Centro Famia Piedra Plat.