Grupo di Teatro Zengenue di Fundacion CCCA (Crea y Conserva Arte y Cultura na Aruba), bao direccion di Sr. Ferdinand Franca, ta presenta e musical ‘Mi ta un Artista’ dia 2 y 4 di juni 2023. Franca, director di e musical, ta conta un poco mas di e musical, su tema y meta tras di esaki.
‘Mi ta un Artista’ ta dedica na Samanta Westera Juppa, directora di scol di baile Club di Movimiento y Sonja Geevers, directora di scol di baile Step by Step.
Franca ta docente di CKV na Ceque College Mavo y ta director di teatro. Den pasado, e tabata encarga cu e musical ‘Planta awe, Cosecha mañan’, cual el a realisa hunto cu Maria College Mavo en conexion cu nan celebracion di 80 aña di existencia. Debi na e exito grandi di e musical aki, Franca a dicidi pa continua cu e genero di musical y trece mas obra di e genero aki original na Papiamento.
Cu e musical ‘Planta awe, Cosecha mañan’, Franca a logra capta interes bao di e hobennan pa drenta e area di Arte y Cultura di Aruba. E aña aki nan ta presenta den e musical ‘Mi ta un Artista. E musical ta conta cu un elenco di alrededor di 50 hoben y 15 hoben actor. Pa loke ta e parti di baile, Franca a ta splica cu a invita scol di baile Club di Movemento, bao direccion di Samanta Westera Juppa, grupo di baile Kids and Youth in Action bao direccion di Debra Boekhoudt y un grupo di hoben dirigi pa Jason Wester y Shaindra Ashby.
E musical ta consisti di dos acto. Acto 1 ta refleha e soño y deseo di Francine pa bira un bailarina y na caminda e ta topa cu diferente obstaculo. Su hada padrinonan lo t’ey pa stimula y motiva pa e no rindi y lucha pa su soño. Acto 2 lo refleha tur loke ta e bataya interno di Francine pa por logra su soño y bira e persona cu e kier bira den futuro.
“Tur dos acto tin temanan di deseo, lucha pa bo pasion, no rindi, pensa cla y habri curason, bira e persona cu bo kier bira y hopi tema mas. Ta bay tin varios genero di musica, tecnica di teatro innovativo, bailenan moderno, y un decoracion y arte visual diferente. E ta un obra humoristico y magico, unda cu tur persona por siña hopi di dje,” Franca a indica.
Fundacion CCCA tin como meta pa prepara mucha y hoben y adulto den arte escenico, pa nan por salvaguardia e existencia di arte y cultura na Aruba. Esaki ta di dos musical cu CCCA ta presenta y lo tin hopi mas den futuro. Tambe Fundacion CCCA ta investiga, documenta y publica loke ta Arte y Cultura di Aruba.
Carchi pa ‘Mi ta un Artista’ ta 25 florin y ta obtenibel na Cas di Cultura, Plaza Bookshop, cerca participantenan di e musical of por yama tambe na 7309696.
“Nos kier gradici Unoca, Departamento di Cultura, BK Consult y Mixed Media, pa nan tremendo aporte pa nos por a realisa e Musical aki. Tambe nos kier gradici e mayor- y alumnonan cu ta participa. Nos ta invita tur mucha, hoben y adulto pa bin presencia e musical y apoya nos talento y produccion local. Nan lo bira nos futuro cantante-, actor- y directornan den futuro,” Franca a finalisa.
