Fundacion Caranan Contento a lanta bek, pa cuminsa bira activo pa brinda sosten na hoben den comunidad, pa mantene e hoben y studiante central y duna e hermentnan necesario den nan estudio, pa nan bay over of slaag.
Judrick Gario, lider di proyecto y organisacion, a splica cu e fundacion a lanta varios aña pasa pa Carol Bruyning, pa siña hoben duna bek na comunidad. E organisacion a crece na John Wesley college, pero a keda inactivo for di 2015.
Gario ta splica cu pa motibo cu ta mira e dificultad cu tin den comunidad, a dicidi pa rebiba e fundacion y nan a tene nan prome actividad diasabra siman pasa.
“Nos meta principal ta pa mantene hoben y studiante central den comunidad. Nos a haci esaki pa medio di proyecto. Nos ta yuda y brinda studiante hermentnan necesario pa bay over y slaag. Cu esaki, e ta posibel 100% pa nan slaag of bay over”, Gario a splica.
Fundacion Caranan Contento ta bisa cu tin hoben cu tin un bashi of ta sinti cu kier logra miho den aña escolar. Nan ta traha den team, cu ta realisa na San Nicolas y ta duna yudansa pa duna posibilidad y herment, mirando cu tecnologia tambe ta avansa ‘ta yuda con ta aplica y sigui studia bay dilanti’.
Nan ta ripara cu tin mucha no ta tribi awendia pa puntra ora nan tin dificultad den les of tin miedo pa acerca nan maestro. Nan ta cera nan mes, cual ta pone cu e hoben ta ansha of bira timido. A pesar cu ta importante pa puntra y pidi ayudo, nan no sa cu tin ‘highlight’ of palabra importante pa nan.
Gario ta bisa cu tur nan proyecto y tayer ta gratis. “Pa 21 di maart nos ta invita tur hoben cu ta den nan ultimo aña di scol secundario pa bin na e tayer cu nos tin”, el a bisa.
Actualmente nan no tin un oficina fiho, pero nan ta purba haci nan mes accesibel na biblioteca of cualkier luga, puntra permiso pa papia cu e hoben pa dun’ e e guia. Nan a haya fondonan pa por realisa nan proyecto, y como fundacion ta contento cu e sector publico y tambe cu scolnan a haci posibel pa nan por sigui cu nan meta.
E edad cu nan ta atende ta hoben di 12 te cu 23 aña di edad. Sinembargo e tayer pa dia 21 di maart proximo ta pa esunnan den 4de klas, pa motibo cu nan ta drentando nan SE 3 y nan examen. Di e forma aki nan ta haya bon pa yuda nan cu e ultimo examen pa nan por slaag.
Den futuro nan tin planea pa atende cu otro dilema den comunidad. Gario ta splica cu hoben awendia no tin un plataforma unda por expresa nan problema di scol, of incomodidad cu nan ta pasa den scol of cualkier situacion cu ta concerni nan. E fundacion kier crea un grupo ‘manera un asamblea’ den cual ta trece solucion.
Den e plataforma nan por tin regla y reunion cu ta wordo treci dilanti cerca minister of parlamentario. No ta conoci cu hoben ta duna feedback, pues cu e plataforma ‘youth council’ nan ta trece esaki dilanti y eynan tur lo haya training necesario pa siña expresa y aborda nan problema y preocupacion di un manera mas profesional.
Nan ta pidi pa mayornan y hoben cu kier participa den e tayer por acerca y yena e formulario, cu ta consisti di ‘un tiki informacion’. E hobennan lo haya cuminda mainta y merdia, tambe tin co’i bebe y otro cosnan pa haci’e mas atractivo pa e hoben.
Cu mas proyecto cu tin, e hoben por tin oportunidad pa ta interactivo y siña con pa bay cu otro hoben, ‘nan por ta learning buddies’. “E ta un manera serio pa diberti y siña pa prepara den futuro.”
Nan ta conta cu sosten di Heart Center Leadership Foundation. Cu nan yudansa tambe nan ta brinda pa e hoben por wak y pensa plan pa futuro, unda e lo kier ta aki 5 pa 10 aña. Nan ta cuminsa wak mas den planea y ta duna herment y guia con pa traha cu nan.
“Ta keda habri pa sugerencia di tayer pa locual ta miho pa studiante pa nan sigui crece. Den e fundacion tin diferente area y tip. Por obtene mas informacion si e-mail fundacioncaranancontento@gmail.com of riba nan pagina di Facebook. Pronto lo tin nan mesun number di celular pa tambe por comunica via WhatsApp.
