Recientemente Aruba cera conoci cu Fundacion Car-Ritmo. Un fundacion nobo cu a nace cu tin e meta pa habri un scol di musica na Aruba. Durante un conferencia di prensa sr. Pedro Kelly, fundador di Fundacion Car-Ritmo, a splica tocante e meta di e fundacion y programa di e scol di musica.
Fundacion Car-Ritmo a keda oficialmente registra na Camara di Comercio dia 25 di april 2023 y e nomber Car-Ritmo ta para pa Ritmo Caribense.
Kelly a remarca cu e meta di e fundacion ta pa stimula y promove e cultura di musica den un forma di educacion, desaroyo y formacion cultural di musica. E fundacion ta ofrece educacion y guia riba tereno di musica.
Pa logra e metanan e fundacion ta bay ofrece educacion riba tereno di musica a base di desaroyo organisa, regla, diferente presentacion, entre otro, festival, encuentro, tayer, curso, charla, seminario y estudio riba e tereno di musica y baile.
E ta bay maneha, mantene y sostene un museo di musica cu ta bay hiba e nomber ‘Cas di Musica pa nos artistanan Arubano’. E ta bay organisa intercambionan riba tereno di musica y ta bay traha hunto cu instancia-, institucion-, organisacion- of fundacionnan na Aruba of den exterior cu kier logra metanan parecido.
Kelly a sigui splica cu scol di musica Car-Ritmo ta brinda posibilidad di estudio pa principiante, hoben y adulto di 6 aña bay ariba. Algo cu el a sigura ta un parti cu ta haci e fundacion aki diferente pasobra practicamente e ta pa tur edad.
“E ta un estudio cu vision pa educa, stimula y desaroya tanto e hoben y adulto pa nan conocemento y sentimento riba e tereno di musica en general cu diferente fase cu tin un duracion promedio segun indicacion di edad,” el a indica.
El a resalta cu prome cu cuminsa cu e fasenan di e programa di scol di musica tin e parti di orientacion pa mucha y hobennan di seis aña bay ariba cu no tin ningun conocemento di musica. E parti di orientacion aki ta inclui formacion musical, e studiantenan ta siña canta, baila, toca entre otro pa asina nan cuminsa haya e vibracion di musica den nan y nan lo siña conoce nan instrumento, cual ta nan mesun stem.
Despues di e parti di orientacion ta bin Fase A. Esaki ta un estudio basico cu por ta individual of den grupo y pa diriga pa studiantenan cu conocemento basico di musica di 9 aña bay ariba y e ta un estudio cu tin un duracion di mas o menos dos pa tres aña.
Kelly a indica cu normalmente e ta dos aña di estudio, pero e fundacion ta pone dos pa tres aña pasobra semper ta bon pa duna un espacio na e studiantenan pasobra pa cada studiante e ta diferente, tin ta capta cos hopi lihe y tin otro studiante cu por ta un tiki slow den nan desaroyo.
E siguiente fase, Fase B, ta un estudio di expansion, desaroyo di oido y ritmo riba un base di presentacion auditivo y memoria. E estudio aki tambe por ta individual of den grupo y ta pa hoben di 12 aña bay ariba.
Kelly a enfatisa cu na momento cu un studiante caba e estudio di Fase B, no kiermen cu e ta cla pa toca den un banda musical. “Ainda bo no a caba, bo tin e conocemento, bo a haya tecnica, bo a haya cierto cos, pero ainda bo no ta prepara suficiente pa por toca den cualkier grupo musical,” el a agrega.
Fase C ta un estudio di intensificacion y profundisacion y e studiante ta wordo stimula pa continuacion. E fase aki tambe tin un duracion di dos aña y ta pa hobennan di 14 aña bay ariba. Kelly a remarca cu den e fase aki nan ta enfoca mas ariba dominio di instrumento y pa e motibo ey e lesnan ta bira hopi intensifica y e studiantenan ta wordo stimula pa sigui bay den siguinte fase.
“Practicamente bo por bisa cu e studiante mes no ta wordo beneficia den esaki, pero esunnan cu ta wordo beneficia den e parti aki ta e agrupacionnan musical pasobra ora cu e agrupacionnan musical wak cu e studiante ta den Fase C nan ta contento pasobra nan ta haya hende cu por toca cu nan den e fase ey pasobra eynan nan tin mas conocemento cu ya nan por haci presentacion den agrupacion musical cu nan ta wordo pidi,” Kelly a agrega.
E ultimo fase, Fase D, ta e fase di specialisacion pa estudio mas avansa y preparacion pa estudio profesional. E fase aki ta pa hoben di 16 aña bay ariba. Na momento cu un studiante caba cu Fase D, e ta keda prepara pa sigui un estudio profesional mas avansa of den otro caso e por lanta of toca den un agrupacion musical.
Kelly a subraya cu e fase aki ta pa hobennan cu ya a haya les di musica caba of cu por ta a pasa den tur e fase nan. Den caso cu tin hobennan cu no a pasa den tur e fasenan di e programa di scol di musica Car-Ritmo, pero cu ya tin conocemento, Kelly a splica cu na momento cu nan inscribi lo haci un evaluacion pa wak con hopi conocemento musical e persona tin caba pa asina determina unda por continua cu e lesnan pa asina yega na e final di e estudio.
El a indica agrega cu e studiante, sobretodo den e parti di e fasenan, por scoge cual instrumento e ta interesa pa siña. Algun instrumento cu e studiantenan por scoge ta entre otro piano, baho, guitara electrico, percusion, guitara, cuatro, violin, trompet, saxofoon y canto.
Despues ta bin e parti di direccion di estudio, cual direccion di estudio e studiante ta scoge. Fundacion Car-Ritmo, Kelly a sigui splica, tin seis facultad. Tin musica Arubano, musica jazz fusion, musica pop, latin jazz, musica brasilero, musica steelpan y teoria di musica y areglo. Ta keda na e studiante, hunto cu e mayor, pa scoge e instrumento y direccion di estudio.
Scol di musica Car-Ritmo lo cuminsa opera den luna di september, segun aña escolar 2023-2024.
