Fundacion BOB (Bevolkingsonderzoek Borstkanker Aruba) Aruba ta pa preveni cancer di pecho sigui crece. Asina por descubri e malesa na tempo y tin mas posibilidad pa e pashent biba un bida largo.

Enrita Werleman, office manager di stichting BOB (Bevolkingsonderzoek Borstkanker) Aruba y tambe un trahado social, a splica nos tocante e fundacion y con cancer su taboo tin cu disparce. “Na aña 2000 nos a ripara cu no tabata papia abiertamente riba e malesa di cancer. Nos a cuminsa cu grupo di pashent mes cu a pasa aden, pa asina duna sosten.”

Werleman ta continua splica cu na 2007, un team di hospital hunto cu departamentonan concerni a dicidi di lanta pa aborda tur locual ta problema cu pecho. Algun dokter tabata preocupa, pa motibo cu tabata ripara cu e cantidad di hende cu ta yega cu tumor ta grandi.

E ta remarca cu tempo ey no tabatin ningun manera preventivo pa controla prome. Si cancer por wordo ataca trempan e ta curabel, hende no tin mester di muri y e fundacion ta duna guia den e proceso. Pero si yega laat, si e tumor ta mas cu 5cm grandi of el a bay pa henter curpa, e tratamento ta bira pisa y bida ta bira mas cortico.

“Na 2009 a cuminsa duna cu programa di prevencion, charlanan na scol. Cancer ta encera bo salud completo”, e ta splica. E ta remarca cu ora hende ta tende ‘cancer’, di biaha ta pensa morto. “Awendia tin hopi tratamento pa un bida mas largo.”

Na 2010 a bin cu fundacion pa prevencion, pa cuminsa haci screening. E ta splica cu a coy un parti di e poblacion cu a haya malesa, y a yama nan regularmente cada dos aña pa nan bin haci test, pa por wak si tin cambio den pecho.

“Nos a lanta fundacion BOB na 2012 pa haci screening. E proceso a dura largo pa nos fundacion, pa motibo cu AZV ta mas pa cuido y no prevencion. Nos a mustra e manera di prevencion pa por scapa bida di hende y ta menos gasto tambe.”

E ta remarca cu awendia mashin ta sofistica y por mira for di 8mmm caba si tin algo creciendo. Ora pashent haya diagnostico mas tempran, e ta haya tratamento menos pisa.

Sinembargo, Werleman ta aclara cu cancer di pecho tin diferente manera cu e ta presenta. Por ta rash di cuero, infeccion, hormona, lechi den pecho. “Mester wak ki tipo di cancer e persona tin. Cada hende ta haya un diferente diagnostico. Mescos cada tratamento ta varia tambe. Tin hende cu mester kimoterapia pisa of tin cu mester djis opera saca pipita.”

E ta splica cu tur cos ta depende hormonanan, por wak unda e cancer ta, con grandi e ta y kico el a invadi. Awendia por construi pecho bek. E fundacion ta enfoca riba educa nos comunidad, atende hende pa nan controla pecho, pasobra tin cancer silencioso.

 

BOB ta pa cierto di edad.
E fundacion ta hende muhe di 45-75 aña, Werleman ta splica cu nan ta hopi stricto, pa motibo cu ta AZV ta esun cu ta paga e screeningnan aki. “Hende cu no tin AZV, persona cu nan status no ta legal, persona bou di 45 aña di edad y hende homber no por bin cerca e fundacion.

E ta bisa si cu ta duna educacion pa controla nan mes y con nan por sigui cu e procedura via nan dokter di cas. E ta splica tambe cu hende homber por sinti e cancer di pecho mas lihe, pa motibo cu pecho ta plat.

“Facilidad cu nos, ta cu nos ta yama pa fecha y orario. Salud ta hopi importante. E proceso ta bay lihe, manera cu haya resultado e dokter tambe ta hay’e. Tur cos ta link na computer di dokter di cas, e sistema ta mas facil. Nos ta yama, bin busca carta, manda potret hospital.”

E ta remarca cu ta yama persona 1 pa 2 siman despues di haci chekeo pa haya resultado. Awe e haya sa, ya mañan e tin afspraak cu specialista. “Tin un bon cooperacion entre BOB, dokter di cas y hospital.”

E screening test.
Werleman ta splica di 24.000 hende muhe cu ta wordo yama, te na momento 8,500 so a haci e chekeo di nan pechonan. “Tin cu ta yama cancela pa motibo di miedo pa haya resultado of miedo cu otro persona ta ocasiona.”

Hende ta prefera di tende cosnan negativo prome cu cosnan positivo. “Nos gusta haya informacion negativo, e noticia malo” asina Werleman ta remarca. E ta splica cu cada persona tin su nivel di dolor. Tin hende cu no ta haya dolor ora di test y tin cu ta grita di dolor.

Si un persona confronta cu mal experiencia, no por bisa cu lo ta malo pa tur hende. “Duna chens na un hende pa por biba, pa por alarga su bida y no spanta hende. A yega di detecta na tempo y persona a wordo salba. Nan ta bibo pa motibo cu nan a bin trempan.”

E ta splica cu despues cu haci screening ta haya resultado den dos siman, y si tin algo cu radiologo a wak, ta yama via dokter conseha pa haci echo, pa asina por check mas profundo, pues ‘no precisamente mester ta algo malo’.

Ta preferibel pa haci e test na Aruba en bes di biaha Colombia of otro pais afo, pasobra aya no ta haya datonan of potret, asina Werleman ta aclara. Tambe a remarca cu no ta recomendabel pa haci test aki na Aruba y despues bay afo, pa motibo di hopi x-rays.

E grupo cu ta core mas riesgo.
Awendia e grupo cu ta core mas riesgo ta ora e ta hereditario. Si tin mas hende den famia cu a yega di tin cancer, si a haya yiu trempan y ta bay den menopausa laat. Tambe e riesgo mas grandi ta comemento malo, no hopi movecion, stress di trabou, famia, divorcio, problema… tur esaki por ocasiona stress y provoca cu e malesa ta crece.

Tambe e ta splica cu si un persona a yega di haya di cancer di ovario, e chens pa haya cancer di pecho tambe ta grandi. Tin hende cu ora nan haya cancer di pecho, dokter ta tuma decision pa saca tambe ovario, pa motibo cu ta produci hopi hormona.

Werleman ta aclara cu golpi na pecho no ta duna cancer, pasobra ta celnan ta esun cu ta haci cambio. “No ta algo di pafo. E caida a pone cu e bulto a sali otro parti, anto por haya cancer. Pero cancer ta origina su mes den e celulanan cu ta multiplica nan mes malo. Tin cu ta laga bo curpa of tin cu ta keda aden, anto unda cu ta bay sinta, eynan ta produci e cancer.”

Na final, el a bisa cu pa siman ta constata 2 caso di cancer di pecho. “Controla y no tene miedo pa prothese. Y cu prothese tambe ta haci chekeo cu regulacion.”