Ayera tardi durante un conferencia di prensa Fundacion Bernadina Growell-Kock a anuncia nan siguiente actividad cultural cu ta bira e di nuebe edicion di nan festival di canto den honor di e difunto Bernadina Growell-Kock.
Presidente di e fundacion, Mervin Wyatt-Ras a splica Fundacion Bernadina Growell-Kock ta existi desde aña 2010. Prome nan tabata un comision y despues a bira un fundacion oficial y asina nan ta organisa diferente actividad rond di difunto Bernadina Growell-Kock, cu ta conoci tambe como Mama di Cultura di Aruba.
Ademas di organisa festivalnan di canto cultural, Wyatt-Ras a splica cu e fundacion tambe a participa na diferente parada cultural, a manda diferente representante pa participa den Reina Cultural y tambe a publica un buki conmemorativo cu ta trata di bida y logronan di difunto Bernadina Growell-Kock.
E aña aki e fundacion ta dedica e festival di canto na un baluarte di musica y cultura di Aruba, Sr. Vicente Ras.
“Esaki ta di nuebe festival y nos ta hopi orguyoso y hopi contento cu tur esnan cu ta duna nos apoyo tur aña. E aña aki atrobe e ta priminti di ta un festival di calidad,” el a indica.
E festival di canto ta tuma luga diasabra 3 di augustus na Centro di Bario Brazil y ta bay tin diferente tipo di cuminda crioyo y ambiente cultural.
Sra. Lena Orman-Yarzagaray, secretaria di e fundacion, a informa cu te cu ayera tabatin mas o menos 6 grupo y 17 participante inscribi pa participa.
El a sigui splica cu e participantenan ta canta diferente cantica di diferente compositor Arubano y na Papiamento. Compositornan ta inclui Don Ramon Bernadina, Robert Jean’Dor, Jacinto Croes, Vicente Kelly, Vicente Ras y Harold Koolman, entre otro.
El a agrega cu e aña aki no tin categoria di mucha, pa motibo cu tin vakantie, pues ta bay tin solamente un categoria, cual ta e categoria di adulto.
Sr. Percy Jean’Dor, vice presidente di Fundacion Bernadina Growell-Kock, a informa cu inscripcion ta habri ainda pa personanan cu ta desea di participa den e festival di canto.
El a remarca cu e festival aki ta dedica na tur Arubano cu cancionnan netamente na Papiamento componi pa compositornan Arubano.
Sr. Jean’Dor a agrega cu e ta trahando riba un buki tambe tocante e bida completo di difunto Bernadina Growell-Kock y tur su musica, cual el a indica no ta facil pasobra difunto Bernadina tin cancionnan cu nunca a wordo canta ni a wordo treci dilanti ainda.
“Mi ta haya asina bunita pa e señora ey, e no ta hunto cu nos mas, pero pa nos trece su cosnan dilanti y trece nomber di Aruba na halto, pasobra nan merece. Tur loke ta compositornan Arubano, nan tin cu sigui crece,” el a resalta.
Ademas di e festival di canto cu Fundacion Bernadina Growell-Kock ta organisando pa diasabra awor, nan lo ta participando tambe den e paradanan cultural cu ta bay tuma luga den luna di september.
