Fundacion Ban Uni Man pa Cria Nos Muchanan ta sigui haya fondonan pa asina continua duna desayuno na scol pa e muchanan mas vulnerabel di Aruba.
Asina a duna di conoce John Fun, presidente di e fundacion, ken a expresa cu manera comunidad ta conoce, nan ta e fundacion cu ta sirbi desayuno tur dia pa alumnonan den necesidad den scolnan cu tin un par di tempo cera. Y awor cu crisis team a dicidi di habri nan, e fundacion lo te’y back pa e muchanan.
Prome cu Covid-19 a yega Aruba, nan a cera e periodo cu 650 mucha. Di esaki el a señala cu e ta spera cu e cifra aki por aumenta den simannan venidero. “Desempleo a aumenta hopi, tin negoshinan cu no ta bayendo bon, e hendenan aki tin yiu cu ta bay scol y tin un chens hopi grandi cu hendenan aki ta bay cay den pobresa.”
Tur aña nan ta comunica cu scolnan cu ta inscribi den e fundacion, ta cuminsa traha cu e cantidad cu nan a cera e aña escolar pasa. Pero asina mes nan tin dos of tres siman pa actualisa e cantidad di mucha, loke ta nifica cu den proximo tres siman, nan lo sa precies cu cuanto mucha nan lo yuda cu desayuno den e aña escolar nobo.
Tambe el a menciona cu te ainda nan no tin un limite di e cantidad di mucha cu nan por yuda, e limite ta e placa. Pero nan ta hayando un bon aporte for di comunidad. CEDE Aruba tambe ta yuda nan, cu e fin di siman aki nan a haci un teleton na radio y TV pa haya fondonan pa apoya Fundacion pa Nos Comunidad, Fundacion Ban Uni Man pa Cria Nos Muchanan y YMCA Aruba.
Den caso aki dia 16 di augustus ultimo, Louis Curiel un meneer di 73 aña di edad, a dicidi di cana desde San Nicolas te Playa un distancia di 25 kilometer cu e obhetivo di recauda fondonan pa e fundacion aki. Curiel a logra recauda 500 florin, mas un otro cantidad cu e fundacion tabatin di 2.600 florin den total, cu lo sirbi pa duna desayuno pa seis mucha na scol pa henter un aña escolar.
“Bo ta kere cu den e temporada aki cu hopi hende a perde trabou tin hende cu no lo duna, pero e aporte tabata hopi bon”, Fun a expresa.
Di mesun manera, Curiel a informa cu proximamente lo haci un otro caminata di 36 kilometer y mey desde Anker di San Nicolas Colony te Faro di Light House, pa sigui yuda e fundacion aki.
