Fundacion Ban Uni Man pa Cria Nos Muchanan a cera aña escolar 2021/2022 cu un deficit bastante grandi, y durante prome seis lunanan di e aña aki 2022 e gastonan tabata surpasa entradanan pa un averahe di 16 mil florin pa luna, yudando 815 mucha. Awor e fundacion ta haya nan mes den un situacion preta unda mester baha e cantidad di mucha pasobra no tin suficiente fondo pa cubri tur.

John Fun, di Fundacion Ban Uni Man Pa Cria Nos Muchanan, ta splica cu e fundacion a premira problema y weita cu reservanan lo baha, pero semper e bestuur a para riba no por wak un mucha bay scol cu stoma bashi. “Nos a sigui yuda e muchanan, prome cu Covid nos tabata yudando mas o menos 635 mucha, pero net despues di pandemia esaki a explota,” segun Sr. Fun. Na Juli 2022 ora aña escolar a cera, tur scol cu ta inscribi cerca e fundacion a haya un carta bisando nan cu mester baha e cantidad di mucha pa nan offset e perdida di 16 mil florin pa luna, esaki mester wordo baha cu un cantidad di 300 mucha pa luna. Enbes di bay yuda tur 800 mucha riba e lista nobo aki, awor esaki mester bira mas o menos 500 mucha. “E ta duro, nos tin varios scol cu a acerca nos caba bisando nos kico ta bay wordo haci pasobra muchanan ta biniendo scol sin pan, y pa hopi di e muchanan aki esaki ta nan cuminda grandi.” Esaki ta algo hopi pica pa e fundacion cu no por yuda e muchanan aki, pero 16 mil florin pa luna bo no por recauda por medio di bay para band’i caminda tampoco, e ta sumanan hopi grandi.

‘E competencia ta grandi pa fondo’
 E fundacion a manda carta na tur service clubs, varios organisacion grandi pidiendo nan pa yuda, pero tin hopi fundacion nobo na Aruba, y tur ta competi pa yuda yena un buraco un caminda y tur mester di placa. E competencia ta grandi pa fondo. “Ban mira kico lo bay pasa,” Sr. Fun ta expresa, agregando cu ‘mi tin ainda e speransa cu pueblo di Aruba lo pasa man riba curason y yuda nos muchanan pasobra nan ta nos futuro di Aruba y nos tur sa cu ora bo bay scol cu un bariga bashi, bo no por studia bon. Esey ta e problema cu nos ta confrontando awe.” E fundacion a dicidi di stop cu Traimerdia pasobra nan ta un programa di lunch, mester warda un rato pa wak con e situacion ta te cu 1 di October. Pues lo sigui yuda nan pa 1 luna mas ainda y ta spera cu pueblo di Aruba lo sa di yuda nan y duna un man pa cria e muchanan, segun Sr. Fun ta comenta.

‘Problema ta social mas cu tur cos’
Hopi tempo pasa, Sr. Fun ta splica – y esaki ta e motibo pa kico a cuminsa yuda Traimerdia – a papia cu minister e tempo ey, a base di esey a dicidi cu lo yuda, aunke cu Traimerdia no ta pa desayuno, a dicidi tog yuda nan. A combersa cu Departamento di Asunto Social, pero no a logra mucho bon pa yega na e meta segun Sr. Fun. “E cos ta, nos ta concentra riba muchanan cu ta bay scol sin desayuno. Mi ta kere e problema ta hopi mas grandi, departamento di Asunto Social tin problema familiar, problema di falta di trabao, mamanan soltero, tur e problemanan ey nan tin cu maneha, mi no sa con nan ta haci’e pero e ta un trabao grandi,” Fun ta splica. E fundacion a yega di tene contacto tambe por ehempel cu Fundacion Pa Nos Comunidad, pero nan doelgroep ta un tiki diferente cu esun di nan. FPNC ta bay mas pa henter e famia y ta percura pa varios famia tur luna haya ayudo cerca nan. “Nos ta specificamente riba e muchanan, y nos a kies pa bay via di e scolnan pasobra e scolnan ta cu e muchanan henter dia pues nan ta den miho posicion pa screen e muchanan riba ken si y ken no tin echt mester di un ayudo.”

E fundacion tin un logistica pa percura pa muchanan haya nan pan, e problema grandi ta con lo offset e deficit ey di 16 mil florin pa luna. Sea pueblo por sponsor un mucha, patronisando ki suma cu por of kier. Dia cu a cuminsa tabata pidi 25 florin pa sponsor un mucha, mientrastanto e ta costando casi 50 florin pa cada mucha, y tur siman ta wak gastonan ta subiendo. Si ta desea pa sponsor un mucha, por haci un standing order na banco cual ta automaticamente bay na cuenta di e fundacion. Por sigui social media di Facebook di Fundacion Ban Uni Man Pa Cria Nos Muchanan pa asina haya nan contacto. Pa loke ta comercio y negoshinan, nan por sponsor un scol cu 5 of 10 mucha, cual lo yuda hopi tambe.