Fundacion Autismo Aruba ta organisando tayer pa docentenan di scol secundario y educacion avansa

Fundacion Autismo Aruba ta bay ofrece un tayer completamente gratis unda cu educadornan lo haya informacion tocante e retonan cu por presenta cu studiantenan den e spectrum di autismo como tambe otro studiantenan neurodiverso.

Pa esaki, Carolina Thiel-Span presidente di e fundacion aki a splica cu tur aña nan ta purba di identifica kico ta bay bira e tema di enfoke pa e siguiente aña y esey pa hopi biaha ta ser haci over e preguntanan cu nan ta haya di mayornan y di e veld manera educadornan, dunadonan di cuido of mayornan, aña pasa nan a identifica cu tin un necesidad pa enfoca un poco riba adolescentenan y hobennan adulto e cual ta un grupo cu tin nan retonan cu ta bin cu nan edadnan pero tambe ta retonan cu ta bin ora e persona ta autista.

P’esey nan kier enfoca riba e topico aki y nan a dicidi di haci sesionnan incluyendo educadornan cu ta enfoca riba e grupo aki manera el a sigura, pa nan haya hermentnan y por compronde nan studiantenan cu ta den e spectrum di autismo pero tambe con por yuda nan ora cu ta papia di por ehemplo, un scol cu ta mas grandi of ora studiantenan tin cu cambia di klas constantemente, cu tambe ta den e retonan di nan.

E tayer aki ta bay ta gratis y ta bay tuma luga diasabra 25 di mey na hotel Hyatt Regency for di 10.30 di mainta te cu 12.30 di merdia y lo conta cu presencia di Roelien Hofman ken ta educador y vice-presidente di e fundacion aki ademas di Carolina Thiel-Span ken ta fungi como presidente y Health Administrator.

“Nos ta bay duna e parti educativo unda nos lo duna un tayer di un nos miembronan di directiva cu ta un educador tambe y mi persona lo duna e parti educativo pero tambe pa nos compronde e retonan cu scolnan ta confronta y nan por comparti con a nan mes ta sali afo for di e retonan aki y con a nan ta logra trece cambio, nos kier tambe pa educadornan por siña di otro educadonan durante e sesion aki,” Thiel Span a sigura.

Den pasado nan a yega di haci tayer pa scolnan primario y pa nan ta importante e participacion, den esaki, el a señala cu e participacion tabata hopi abou lamentablemente.

Registracion pa e tayer aki ta habri ainda y por haya mas informacion riba nan Facebook y Instagram page, tambe a informa cu e biaha aki nan mester a aumenta e capacidad di participantenan pa motibo cu nan a surpasa e cantidad di personanan registra.