Riba 2 di april, mundo ta conmemora Dia Mundial di Autismo. En conexion cu esaki, ayera un delegacion di Fundacion Autismo Aruba (FAA) a sali rumbo pa Nacionnan Uni pa asina participa den un foro internacional, unda lo papia riba e desafionan cu tin na Aruba pa locual ta e aceptacion, inclusion y accesibilidad na recursonan pa hende cu autismo.
Durante un conferencia di prensa prome cu e delegacion a subi avion, presidente di FAA Carolina Thiel-Span, a elabora ariba con nan participacion ta bay ta durante e foro y kico ta loke nan ta bay trece adelanto pa subraya e desafionan cu personanan cu autismo ta enfrenta na Aruba.
Thiel-Span a splica cu autismo ta un condicion unda un persona ta nace cu un diferencia cu ta haciele neurodiverso. Esaki simplemente kiermen cu e persona su forma di compronde mundo ta un tiki diferente. Autismo ta wordo considera un trastorno di desaroyo pasobra e forma un persona autista ta desaroya ta diferente y esey kiermen cu e mester di mas sosten cu un persona neurotipico.
Den algun caso, el a indica, esaki por significa cu e persona por funciona den un scol regular y den otro casonan no. “Tur persona ta completamente diferente y ta rekeri di nan asistencia pa asina por sa kico ta nan potencial maximo y unda nan por funciona na nan miho habilidad,” el a remarca.
Como fundacion FAA tin hopi aña ta purba di crea conscientisacion na Aruba. Thiel-Span a resalta cu aunke nan ta contento pa wak cu e conscientisacion ta trahando y mayoria hende sa kico autismo ta, por lo menos na un nivel basico, nan ta wak mas y mas desafio ta bin pa dilanti na momento cu mester interactua na scol, den area social of na trabao, cu personanan autista. Esaki ta un punto cu e fundacion tin algun aña caba ta enfoca nan energia riba dje y cu nan lo sigui enfoca riba dje den e añanan binidero.
Un stap grandi pa esaki e aña aki, Thiel-Span a señala, ta nan participacion den e foro internacional na Nacionnan Uni unda cu nan lo papia riba e desafionan cu nan ta wak na Aruba pa locual cu ta e aceptacion, inclusion y accesibilidad na recursonan pa personanan cu ta autista, incluyendo muchanan, pero tambe adultonan. Esaki, el indica, tin di haber cu educacion, salubridad y e aspecto social.
FAA ta biahando cu un delegacion di cinco persona di cual cuater lo ta participando activamente den e foro. Cada persona lo trece pa dilanti diferente area y ta areanan cu nan mes tin experiencia cune.
Stephany van der Biezen-Croes lo trece pa dilanti e aspecto di un mayor di un mucha cu ta bringando pa ta e voz pa mucha- y adultonan cu ta autista aki na Aruba, y tambe pa nan famianan. Kay Quandus, embahadora di FAA y artista lo ta exhibiendo seis pintura hunto cu seis poema y tambe un piesa di moda cu su mes a diseña. Byron Lesire ta un hoben adulto autista l conoci den comunidad. Durante e foro e lo trece pa dilanti e tema di intervencion trempan, cual ta un tema hopi importante pa por yuda e muchanan den desaroyo di autismo.
Thiel-Span a sigui splica cu FAA a wordo invita for di aña pasa na momento cu WOH (World Health Organization) y UNICEF tabata terminando e rapport Global Report on Developmental Disabilities, specificamente riba muchanan, unda nan a wak cu diferente pais a implementa diferente herment di entre otro WOH pa wak kico e efecto positivo tabata na diferente pais cu diferente situacion socioeconomico, pero tambe riba nivel di educacion.
Di e manera aki, el a indica, e fundacion por a wak cu na Aruba tambe nan ta comparti diferente desafio cu diferente pais rond mundo y nos a wordo acerca pa forma parti di e mundo di defensa cu e diferente organisacionnan aki ta haci.
“Nos a acepta e desafio aki, cual tabata un aña basta largo di preparacion. E ta algo nobo pa nos, pero nos ta hopi contento cu nos a wordo invita pa forma parti di esaki y cu nos ta haya oportunidad pa papia di e desafionan,” el a subraya.
Thiel-Span a remarca cu Aruba ta un pais chikito, un isla den Caribe cu tin e mesun desafionan cu mayoria paisnan chikito cu recursonan limita rond di mundo. El a enfatisa cu nan a realisa cu nan so no por haci tur cos y aunke nan tin sosten di tur partner, nan yega na e realisacion cu nan mester di e comunidad internacional pa nan por yega na e cambionan cu nan kier wak.
“Mi ta spera cu tur persona awe riba dia mundial di autismo por combersa cu esunnan rond di bo y asina puntra bo mes kico si ta den mi man pa por haci e cambio pa nos yega na un Aruba mas inclusivo,” el a finalisa.
