Luna di april tabata luna di Trahado Social, na unda diferente instancia y fundacion a realisa actividadnan pa conmemora e labor di esnan cu ta dedica na esaki. Ademas di esey tambe ta luna di conscientisacion di autismo, na unda dia 30 di april nan a haci “Relay For Inclusion Competition” como parti di nan actividadnan tocante inclusion.
Relay for Inclusion tabata un actividad cu tabata consisti di diferente wega, unda cu un grupo di 5 persona lo mester a traha hunto pa por sigui avansa y posiblemente gana e relay aki. Nan a motiva organisacionnan pa participa y asina aporta na Fundacion Autismo Aruba di un forma diferente.
Tabata un evento cu hopi accion, sonrisa y compañerismo pa fomenta inclusion di personanan cu autismo y otro limitacionnan neurologico den nos comunidad.
E gruponan ganado ta: 1er luga: Amore Mio Pizzeria, 2do luga: High 5 Facultad di Hospitalidad y Turismo di Universidad di Aruba, 3er luga: Amsterdam Manor Resort, 4to luga: Cupido’s Team – Cupido Express Aruba.
Ademas di esey, durante luna di april nan tabata tin un anochi informativo cu e meta pa mayornan haya un poco mas informacion tocante e tema, e rol di Fundacion Autismo Aruba, informacion importante di e kinderpsychiater di Stichting HUNTO, un hoben adulto autista y tambe scucha di diferente mayornan, ademas di e importancia di brinda sosten.
Esaki tabata un oportunidad tambe pa mayornan por comparti nan experiencia cu otro y comparti ideanan y asina crea un support system cu otro mayornan.
