Fundacion Autismo Aruba a biaha pa Peru pa asina participa den Latin America Autism Summit 2024 pa asina participa como orador y asina ey mustra como ehemplo den region pa e forma di comunica tocante autismo y logra crea conscientisacion.

Su presidente Carolina Thiel-Span tabata un orador caminda a haya e oportunidad pa conta un poco di nan forma di traha riba conscientisacion pa trece cambio y inclusion na Aruba. Esaki tabata un momento importante pa haya un miho idea di kico otro paisnan den Latino America ta experiencia como tambe pa compronde con pa anda cu diferente situacion similar.

Durante e evento aki tambe tabata tin hopi profesionalnan presente di Merca cu tambe a comparti nan “best practices” den e ramo di autismo y nan asina tambe logra crea conexionnan nobo cu organisacionnan manera Autism Global cual tabata un di e organisadonan como tambe profesionalnan individual.

“Nos ta contento di por a participa como orador na e evento aki y sigur pa a por a ta un ehempel den region den nos forma di comunica tocante Autismo den medionan social pa logra crea conscientisacion,” Thiel-Span a sigura.

Por a recorda cu dia 4 di April ultimo Fundacion Autismo Aruba a marca historia y a participa na un foro internacional na Nacionnan Uni titula “Call to Action” cu e meta pa boga pa un miho futuro pa personanan autista na Aruba.

Nan a señala cu eski tabata “Un experiencia inigualabel unda e mensahe di Fundacion Autismo Aruba su self-advocates Byron Lesire & Kay Quandus, mom-advocate Stephany van der Biezen-Croes y presidente Carolina Thiel-Span a ser comparti cu entre otro UNICEF, WHO, Autism Speaks como tambe delegacionnan di Philippines, Malaysia, Zambia, Bangladesh, USA y Qatar.”

Den e foro internacional aki nan a papia riba e desafionan cu tin na Aruba pa locual ta e aceptacion, inclusion y accesibilidad na recursonan pa hendenan cu autismo.

Den un conferencia di prensa dia 1 di april cu Fundacion Autismo Aruba a haci prome cu nan lo a biaha, Thiel-Span a splica cu autismo ta un condicion unda un persona ta nace cu un diferencia cu ta haciele neurodiverso. Esaki simplemente kiermen cu e persona su forma di compronde mundo ta un tiki diferente.

Autismo ta wordo considera un trastorno di desaroyo pasobra e forma un persona autista ta desaroya ta diferente y esey kiermen cu e mester di mas sosten cu un persona neurotipico.