Fundacion Arte di Palabra ta invita un y tur pa participa na e di diesocho competencia di haiku Elis Juliana.
Cada persona por skirbi uno te dies haiku y manda esaki prome cu 16 di februari 2025 pa Ange Jessurun, na kompetensiahaiku@hotmail.com
Por favor manda maximalmente 10 haiku como “attachment” den Word sin “lay-out” adicional. Por favor numera bo haikunan y pone bo nomber bou di nan. (no usa kolom, ni hoki etc.)
Por participa den e siguiente categorianan:
- Alumno di klas 1- 2 di enseñansa secundario
- Alumno di klas 3-6 y EPI klas 1-2
- Tur otro persona interesa di islanan ABC
Lo menciona e ganadonan durante final di Arte di Palabra Corsou dia 12 di april 2025, y lo publica e miho haikunan. Elis Juliana ta esun cu a introduci haiku, un forma literario Hapones, na Papiamento. Elis Juliana (1927 -2013) a skirbi un cantidad di cuenta cortico, mas cu un dozijn di coleccion di poesia y a contribui grandemente na desaroyo di mucha. Banda di autor, el a haci uzo di e parti ritmico y tonal di Papiamento, creando asina su propio estilo.
Kico ta haiku?
Por bisa cu haiku ta un arte di palabra.
Haiku ta un forma di poesia Hapones masha cortico cu ta existi pa hopi siglo caba. E ta diferente for di poesia ritmico of poesia cu ta rima cu bo a custumbra cune. E ta manera un potret cu ta capta esencia di loke ta pasando.
Cu solamente algun palabra, un haiku ta capta bo atencion y ta bisa bo: wak esaki of pensa riba esaki. Originalmente, haiku Hapones ta trata di naturalesa. Awendia e por trata cualke tema. Elis Juliana ta bisa cu el a probecha di haiku pa duna pueblo balor di forsa di palabra.
Haiku ta poema di diesshete silaba parti den tres unidad di cinco, shete y cinco silaba.
Con ta skirbi haiku?
- Scoge un tema y skirbi algun palabra cu bo conoce di e tema.
Haiku no tin titulo. E ta para riba su mes.
Un haiku por describi casi tur topico. Basta e no ta mucho complica, y e ta simpel y comprendibel. Un bon haiku ta describi suceso di bida diario na un manera cu ta duna e lesado/scuchado un bista completamente nobo/diferente di un situacion ya conoci.
- Parti bo pensamentonan den tres liña: den e prome bo ta introduci e topico, haciendo un ponencia.
Caba amplia esaki:
- Expresando un sintimento
- Haciendo un observacion of splicando un accion.
Un haiku ta duna un sabiduria di bida of ta duna un mensahe.
- Polish bo haiku te ora e forma tres liña, e prome di cinco, e di dos di shete y e di tres di cinco silaba. Esaki por tuma tempo, pero sigui cambia palabra te dia bo logra.
Tip: expresa un solo sintimento of emocion den bo haiku. Pensa riba un experencia of bista comun na un manera nobo y diferente. No ta uza abreviacion, cada palabra ta riba su mes.
Por uza solamente palabra na Papiamento.
