Fundacion Alzheimer’s Aruba a organisa un bunita presentacion unda cu a brinda tur e personanan cu a atende e presentacion aki un gran cantidad di informacion util y necesario pa conscientisa e comunidad tocante Alzheimer’s y con esaki ta afecta tanto e pashent como e familiarnan cercano di su persona.
Alzheimer’s ta un tipo di trastorno, cu ta ireversibel, progresivo y ta afecta un gran cantidad di persona, cu aunke mayoria ta di edad avansa, por tin tambe un edad bastante hoben. E ta e tipo di trastorno of anteriormente conoci como demencia, cu ta cuminsa cu perdida di memoria leve, te na e perdida di e habilidad di sigui un combersacion y responde na e ambiente.
E ta involucra partinan di e cerebro cu ta controla pensamento, memoria y lenguahe. E malesa aki por afecta un persona su habilidad di ehecuta actividadnan diario di un manera sumamente serio.
Cientificonan te ainda no ta compronde completamente kico ta causa e trastorno aki. Posiblemente e no tin un solo causa, sino varios factor cu por afecta cada persona di manera diferente. Entre e factornan tin Edad, Historia familiar y cambio den cerebro.
E riesgo mas conoci di Alzheimer’s ta edad. Sinembargo, cambionan den e cerebro por cuminsa añanan prome cu e prome sintoma aparece of ser sinti, causando cu e ta posibel pa tin Alzheimer’s cu un edad mucho mas trempan di loke nos ta kere. E historia familiar tambe ta hunga un rol, pa motibo cu investigadornan ta kere cu genetica tambe ta hunga un rol den e desaroyo di Alzheimer’s. Sinembargo, un estilo di bida saludabel por yuda reduci bo riesgo di desaroya e trastorno aki. Di mesun manera, ta studiante si educacion, dieet y ambiente ta hunga un rol den e desaroyo di e trastorno aki. Tin evidencia cu ta creciendo unda cu tambe por mira cu comportamentonan saludabel, cual a ser demostra di por preveni cancer y diabetes, posiblemente por reduci e riesgonan di Alzheimers.
E presentacion a cuminsa banda di 7or di anochi, unda cu lr. Roberto Croes a papia un poco tocante cifranan y estadisticanan cu mester tene cuenta cune. Entre otro, a enfatisa cu e poblacion cada biaha ta birando mas grandi, y e hobennan ta birando menos. Esaki ta nifica cu mester presta atencion riba esaki y ekipa nos hobennan cu e conocemento y hermentnan necesario pa nan por brinda cuido na e grandinan cu posiblemente lo tin mester di esaki, ademas di proteha nan mes y mehora nan estilo di bida pa por preveni cualkier tipo di malesa, mirando cu lo por tin un escasez di persona disponibel cu lo por brinda un cuido na nan.
Tambe a trece dilanti e punto cu den aña 2010 tabatin 1,018 persona cu Alzheimer’s na Aruba, y a mira cu e cifra aki ta keda aumenta di manera significante, cu 1,682 den aña 2020, y un proyeccion di 2,345 persona pa aña 2030.
Despues di un pausa chikito, unda cu a haya e oportunidad pa comparti cu otro y comparti experiencianan, a sigui cu e di dos parti di e presentacion.
Drs. Melva Croes-Yanez ken ta neuropsicologo a papia tocante e diagnostico y e bida despues di ricibi un diagnosis. Aki a enfatisa riba varios punto riba cual lo elabora proximamente, pero a sobresali entre otro, cu hopi di nos grandinan no ta ricibi un cuido adecua, tanto di familiarnan como di centronan di cuido. Hopi di nan ta ser abusa, y no tin ni persona ni tampoco ley cu ta para pa nan. Te ainda no ta tende papia di ley specificamente pa e proteccion di nos grandinan, y por mira cu tin un necesidad sumamente grandi pa esaki. Ademas, a trata e punto unda cu hopi pashent no ta al tanto di nan derecho como pashent, como por ehempel, e derecho di ricibi un diagnosis por escrito, cual por crea un record medico cu e pashent por tin disponibel na cualkier momento cu esaki bira necesario.
E tabata un presentacion sumamente informativo y educativo, unda cu por a mira cu te ainda tin hopi trabao cu mester haci pa conscientisa e comunidad tocante e trastorno aki, y tocante e calidad di bida cu nos grandinan tin y lo trata cada un di e puntonan cu mas detaye y profundidad proximamente.
