Den un entrevista cu Annelot Muijres, fundado di e fundacion oficial Ajudo na Aruba, el a conta tocante e pobresa aumentando entre e hendenan local pa motibo di e crisis di Covid-19 y e situacion financiero riba nos isla.

“Nos ta alimenta 12mil boca pa luna, e peticion pa ayudo ta aumentando drasticamente mientras e donacionnan ta cayendo. P’esey nos ta organisando un rifa. Nos ta spera cu hende lo cumpra un ticket y haya e chens di gana e miho premionan, mientras ta duna sosten na esnan cu a cay den pobresa”, el a comenta.

E 12mil boca pa luna ta bin di entre 400 y 500 famia pa siman, na ken ta provee pakete semanal di FANA, segun Muijres. “Nos tin famianan entre 2 pa 9 persona, pues tur ta diferente. Notabel ta e baby boom actualmente, aproximadamente nuebe luna despues di carnaval. Nos tin hopi recien naci cu ta costa hopi placa, y cantidad di mama hoben cu no por provee. FANA ta ofrece ayudo pa duna pecho, formula di baby, y pamper, y pa e motibo aki nos mester di donacionnan urgente.”

Tambe el a nota cu mayoria di Arubiano registra awo a keda sin placa cu tabatin spaar, y ainda ta sin trabou, ademas sin e sosten financiero di gobierno. Hopi tambe ta informa Muijres cu e banco di cuminda oficial y Cruz Cora ta yen, pues no ta capaz di registra nan, y consecuentemente nan ta bay cerca FANA.

“Nos peticion pa registracion ta aumenta mientras nos donacionnan ta disminui. Pa e motibo aki nos ta organisando un rifa unda por gana tremendo premionan y na mes momento ta sostene hende den necesidad door di cumpra un ticket. Nos ta apelando na boso como comunidad, como bishitante, pa duna asistencia na nos bon causa. Nos ta haciendo esaki completamente a base boluntario, niun hende aki ta cobra pa nan trabou. Nos tur tin trabou banda di esaki, y djis kier contribui na e isla aki y si ta posibel, haci pobresa desaparece. Si bo kier trece cuminda na luga di duna placa ta bon bini. Cuminda semper ta bon y otro producto cu nos por usa ta paña pa mucha muhe, for di baby te cu 5 aña, tur esey ta necesario.”

Rifa
Por cumpra ticket na diferente ubicacion, cada ticket tin un number unico. Notario Rodriguez-Taekema lo realisa e sorteo dia 23 di october proximo. FANA lo transmiti e evento aki en bibo riba Facebook. 100% di e placa di ticket colecta lo ser usa pa cumpra cuminda y productonan basico di higiena pa e famianan den necesidad. E premionan ta inclui varios actividad gastronomico y di entretenimento riba nos isla, cada un na balor di entre $50 y $900, por check esakinan bishitando e pagina di Facebook di FANA.

Sitionan oficial di benta te cu 20 di october lo ta:
FANA, diabierna, diasabra, diadomingo y dialuna for di 9am-12pm. Av. Milo Croes 70.
De Pub, habri 7 dia pa siman di 6pm-11pm. Palm Beach 55.
Boegaloe, habri 7 dia pa siman, di 8am-11pm. J.E. Irausquin Blvd 19, Oranjestad.
Boluntarionan di FANA, casi tur boluntario ta bende ticket tambe, djis keda pendiente di nan t-shirt cora of sticker riba auto!

Refugiadonan
FANA ta colabora cu HIAS, un organisacion Hudiu Mericano sin fin di lucro cu ta duna asistencia y ayudo humanitario na refugiado. Muijres a informa anteriormente cu e ta calcula cu tin entre 25mil y 30mil migrante ilegal riba e isla. E poblacion total legal na Aruba ta alrededor di 106mil habitante. “E refugiadonan aki no tin seguro medico, no tin trabou y nan ta den necesidad inmediato di cuminda y lechi pa baby.” Arubahuis, e representante oficial di Aruba na Hulanda, recientemente a anuncia sosten pa FANA, door di pone aviso online con pa haci donacion na e fundacion.

Poder boluntario
Muijres a cuminsa e iniciativa aki preparando cuminda cushina na su cas, pero pronto el a ripara cu esaki no tabata suficiente. E organisacion a bira un fundacion oficial cu presidente Annelot Muijres, secretario Lizzy Jansen y tesorero Xander Muijres. Nan ta yuda tur hende den necesidad, no solamente proveyendo plato di cuminda of compras, sino tambe sosten den necesidadnan basico manera pamper, formula di baby, habon, etc. “Nos ta haciendo esaki cu tur amor y ayudo di nos boluntarionan fantastico. Nos ta gradici boso tur di fondo di nos curason. E proyecto ta depende riba e esfuerso tremendo di e boluntarionan, ya cu nan ta haci e trabou aki exitoso. Nan ta traha oranan largo y ta tuma tempo precioso for di boso propio famianan pa yuda Ajudo na Aruba yega na esnan den necesidad”, Muijres a bisa.

Pa join nan team fantastico, por tuma contacto cu e organisacion a traves di e pagina di contacto riba nan Website. Nos corant ruman, Aruba Today tin un video tocante e fundacion riba nan pagina di Facebook y nan website, titula ‘Corona Street Talk – Ajudo na Aruba.
 Facebook: FANA Fundacion Ajudo na Aruba, Website: https://www.ajudonaaruba.com