Mediante un comunicado di prensa Ministerio Publico a informa cu agente policial K.A.P. siman pasa a keda condena pa Corte di Prome Instancia.
Corte den prome instancia a dicta siman pasa den e caso penal contra e sospechoso K.A.P., kende a causa un accidente di trafico riba 19 di augustus 2023 na Bakval.
P., kende ta un agente policial, tabata core sin rijbewijs valido y tabata bao influencia di alcohol. Hues di trafico a conden’e cu un multa di 1.250 florin y un prohibicion pa stuur auto di shete luna, cu un tempo di prueba di dos aña. Si e sospechoso no paga e multa na tempo, e tin cu sinta 25 dia di detencion.
Ademas hues a conden’e pa sigui e curso obligatorio di alcohol den trafico.
Dia 19 di augustus ultimo, a bira conoci e noticia cu un funcionario di Cuerpo di Polis di Aruba a keda envolvi den un accidente di transito, unda supuestamente, segun otro medionan local a sigura, e funcionario tabata bao influencia di alcohol y a nenga pa keda deteni despues cu a causa e accidente.
Den e caso aki, ta trata di un funcionario cu un rango halto di Cuerpo Policial, kende tabata stuur un auto di trabao y dal otro auto cu tabata staciona, segun e mesun medionan local cu a reporta esaki. Nan a señala cu e polis en cuestion a supla y e nivel di alcohol tabata mustra cu tabata intoxica, mas e no a keda deteni.
Un hecho cu a causa mal contento den comunidad mirando e caso serio aki, na unda ta trata di un polis di rango halto cu mester duna ehemplo na comunidad, caminda ta bin dilanti e dicho “si bo ta bebe, no ta stuur.”
Mediante un comunicado di prensa di Cuerpo do Polis e mesun dia den oranan di atardi, a informa cu nan ta lamenta e sucedido di dia 19 di augustus cu e colega di nan, como tambe e otro coleganan cu tabata na e sitio.
“E caso aki ta wordo tuma na serio. Como polis nos ta mester duna un bon ehempel pa e comunidad. Vooral den funcionnan cu ta rekeri esaki. Nos ta compronde tambe e sentimento y emocion rond di e sucedido aki.” altocomisario di polis Sr. Ramon Arnhem a señala.
Mando policial a tuma medidanan interno pa cu e colega envolvi den e caso aki. Den colaboracion cu Ministerio Publico unda cu den e tempo ey funcionario envolvi a keda suspendi di su funcion.
