Na aña 2017 a surgi un conflicto na Departamento di Obra Publico (DOW) entre un funcionario (N.J.Z.S.) y dirigencia di e departamento. Ta trata di un funcionario cu tabata designa pa traha na despacho di e anterior ministro encarga cu Infrastructura y Obra Publico, y cu despues di cambio di gobierno a haya notificacion cu e mester a bolbe pa DOW unda e tabata traha anteriormente. E persona no tabata di acuerdo cu esaki, ya cu e tabatin un peticion pendiente pa ‘overplaatsing’ pa un otro departamento gubernamental.

Por medio di un decreto (Landsbesluit) di 5 di october 2018, Pais Aruba a tuma e decision di duna e persona su retiro, entrante 22 di februari 2018, pa a kibra e relacion di trabao arbitrariamente. E funcionario a apela e decision aki na november 2018 y 20 di mei 2019 Hues pa caso di ambtenaar a trata e caso. Despues tabatin ainda intercambio di documento y reaccion riba esaki. Finalmente dia 9 di september recien pasa Hues a dicta su veredicto den e caso, unda cu el a rechasa e apelacion.

E caso a cuminsa den tempo di cambio di gobierno na 2017. Desde 20 di maart 2017 e funcionario tabata disposicion di despacho di ministro encarga cu Desaroyo Teritorial, Infrastructura y Integracion.

A traves di carta di 13 di november 2017 director di DOW a instrui e funcionario pa e presenta na trabao na DOW entrante 14 di november 2017. Segun e director, e idea lo tabata cu na final di e periodo na oficina di ministro, cu tabata 31 di october, e funcionario lo mester a haya un otro empleo den aparato publico. Como cu esey no a keda realisa, tabata considera cu pa 1 di november 2017 e persona ta emplea na y riba payroll di DOW atrobe.

Despues di e notificacion aki, e persona no a presenta na DOW pa traha, loke segun e Director ta considera un ruptura arbitrario di e relacion di trabao. Seguidamente, den un carta fecha 23 di november 2017, e funcionario a notifica e director di DOW cu el a presenta na e departamento pa cual e overplaatsing lo a tuma luga, cu tabata Ministerio Publico, y cu lo a pone riba payroll di Ministerio Publico. Sin embargo, Director di DOW a haya notificacion di Director di DRH cu e traslado pa otro departamento no a keda concretisa ainda y cu por lo tanto e persona mester a bolbe riba payroll di DOW y presenta na trabao ey tambe.

Den un mail di dia 30 di november 2017 e funcionario a pidi Director di DOW pa 10 dia di vakantie, pa e por regla otro overplaatsing, ya cu e anterior no a resulta. Dia 1 di december 2017 Director di DOW a concede e dianan pidi y a duna vakantie te dia 31 di december 2017. Dia 3 di januari 2018 e persona lo mester a presenta na trabao na DOW.

Despues e funcionario a ‘meld AO’ y a keda incapacita pa traha te cu dia 12 di februari 2018. Despues e funcionario tabatin vakantie te dia 16 di februari 2018, y riba 19 y 20 di februari 2018 e tabata ‘AO’ atrobe.

Den un carta fecha 20 di februari 2018 e funcionario a pone DRH na altura cu e no ta desea di bolbe na DOW y cu e ta keda pendiente di un posicion similar na otro departamento.

Por medio di carta fecha 29 di maart 2018 director di DOW a notifica e funcionario cu el a keda sin presenta na trabao na DOW dia 21 di februari 2018, cu lo para su salario entrante 1 di april 2018 y cu por exigi debolbe e salario paga pa e periodo entre 22 di februari 2018 te 1 di april 2018.

E funcionario a apela e decision aki y den veredicto duna dia 12 di november 2018 Hues den caso di ambtenaar a haya cu e apelacion no tabatin base. E funcionario no a aparece mas na trabao y dia 5 di october 2018 a concretisa e Landsbesluit di retiro contra cual e funcionario a apela y cu a keda rechasa dia 9 di september ultimo.

Den su argumentacion, segun e sentencia, e funcionario a aludi ampliamente na e ambiente negativo contra su persona, tanto di e actual ministro encarga cu Infrastructura, y personanan den dirigencia di e departamento. Segun e funcionario, a hunga un papel den e asunto aki cu e ta casa di un conocido reportero, cu “no por pasa den mesun porta hunto cu e mandatario aki.” Por lo tanto e tabata haya cu bao di e circunstancianan ey no por a spera di su persona cu e ta keda haci su trabao na un luga y bao di un ministro cu no tabata kier e eynan. Den e circunstancianan aki, e funcionario no tabata haya cu tabatin un base pa retiro a base di nenga trabao.

Hues sin embargo no a mira e caso asina. Hues ta haya cu no tabatin prueba di permiso pa keda cas pendiente otro posicion na otro departamento, y cu e circunstancia di un situacion menos agradabel na trabao riba su mes no ta suficiente motibo pa no aparece mas na trabao. “E consecuencianan di e escogencia di e funcionario pa desde 21 di februari 2018 no presenta mas na trabao ta pa su propio cuenta y riesgo.”

Contra e veredicto aki tin posibilidad di apela cerca ‘Raad van Beroep in Ambtenarenzaken’ dentro di 30 dia.