Recientemente a capta atencion un fenomeno entre ministernan di gobierno, actual y den pasado, unda ministernan ta trece nan famia cu nan mientras ta eherciendo trabao oficial di minister.
Esaki a pone duda riba e profesionalismo di un minister, na momento cu durante cu ta eherce su funcion ta compaña pa su casa y yiunan. Kico ta e proposito di esaki?
Hopi diferente ta ora un funcionario publico ta atende un evento publico, pero den un capacidad personal. Ta trata aki eventonan unda e minister en cuestion no tin ningun funcion, pues no ta haci entrega di premio, no ta duna discurso, no ta firma documento, etc.
Na eventonan asina, ta mas cu bon bini pa cualkier minister atende den famia como bon ciudadano y disfruta y comparti sanamente.
Pero na momento cu e minister ta presenta pa haci su trabao como minister, pakico e ta compaña pa su famia? E famia – sea ta esposa of yiu – no tin un posicion den gobierno, y no tin un funcion ni un tarea pa eherce banda di e minister. Pues kico ta e proposito di su presencia na eventonan oficial?
Fuera cu no tin ningun proposito, e presencia di familiarnan di ministernan durante cu e minister ta eherce su trabao ta presenta un riesgo di nepotismo y influencia indebido. Por ehemplo, por ta e caso cu e casa di e minister durante e evento ta usa su influencia pa yega na cierto acuerdonan secreto cu esnan presente. Den un caso asina lo ta hopi dificil pa proba e uso indebido di influencia, y ta presta pa corupcion sin cu esaki ta necesario.
Ademas, ta eleva e posicion di e famia di e minister na uno semi-oficial. E famia di un minister of funcionario publico no tin funcion den gobierno, y pues en principio no mester tin e privilegio y acceso na cierto evento cu e minister si por goza di dje. Na momento cu e minister indebidamente ta extende su privilegio na su famia, por papia aki di nepotismo.
E definicion di nepotismo ta inclui e “uilisacion di un cargo pa concede na famia of amigo algun tipo di fabor, fuera di e principio di merito y capacidad.”
Por considera e ora cu e presencia di famia di un minister na un funcion oficial ta un fabor cu ta carece di merito.
Por ehemplo, un minister ta presenta pa duna un discurso of entrega premio of certificado of firma un acuerdo na un evento cultural, deportivo, di innovacion, etc., y ta “den nomber di gobierno di Aruba,” y ta manda potret di e evento a traves di canalnan oficial di gobierno, cu logo di gobierno di Aruba… pero ata nos ta mira e mandatario cu casa, yiu, of nieto riba potret.
Pero si e mandatario tabata representando gobierno, ki funcion e famia tabata fungi na e ocasion? Nan tambe tabata representando gobierno? Nos por conclui asina cu casa, yiu of nieto di un minister tambe ta un miembro di gobierno, y cu e tambe ta representa gobierno y por fungi den nomber di gobierno, sin ta electo, sin pasa screening, sin cu tin cu duna cuenta di su actonan durante e funcionnan aki?
Y no ta solamente e ministernan di e gobernacion aki, ya cu den pasado a mira e mesun fenomeno, tambe cu parlamentario y otro funcionario durante funcionnan oficial.
Un biaha mas mester destaca cu cualkier funcionario di gobierno, minister y parlamentario tin libertad pa atende evento cu su famia. Pero no den un capacidad oficial, y no mientras ta representando gobierno. Esaki sigur ta a lo minimo un falta di profesionalismo – cua trahador mag presenta na pia di trabao compaña pa su yiunan? – y na lo maximo un muestra di e nepotismo cu ya ta un custumber cu raiz profundo entre nos elite politico, e famoso “friends & family.”
