Fumigacion contra sangura Zika ‘mucho laat’

E siman aki GKMB a cuminsa fumiga den mas tanto e area pariba di brug unda a constata basta caso di Zika, compara cu otro areanan na Aruba. Un accion cu for di e sector medico Bon Dia Aruba ta haya comentario cu esaki ta ‘mucho laat’.

Manera nos corant ta publicando for di siman pasa, e biaha aki autoridadnan a actua cu tardansa  riba señalnan di sector medico ya for di december cu nan ta mira un ‘outbreak’ na caminda di Zika. Corsou y Boneiro tabata tin problema grandi cu e malesa di sangura aki caba y a proclama epidemia. Sinembargo na Aruba e instancianan concerni manera Departamento di Salud y GKMB a keda keto.

Clayton Croes di GKMB ta bisa sinembargo cu e datonan no tabata asina cu nan ta sinti cu nan mester actua. Ta ora na februari nan a haya e cifranan for di Departamento di Salud cu berdad tin un aumento hopi mas grandi, cu e team special (VAT) a drenta den accion. Pero e ta admiti si cu por tin un mehoracion den e analisis di data pa nan por a actua mas lihe, aunke den practica esaki ta dificil.

Dialuna e instancia aki a cuminsa fumiga. Pero for di dokternan di cas Bon Dia Aruba tambe ta tende comentario dicon nan no a cuminsa fumiga mas trempan y asina ‘evita cu Zika a bira un problema grandi manera e ta awor’.

Departamento di Salud a duna cifranan dialuna, manera Bon Dia Aruba a publica. Nan a indica cu esaki tabata e ‘ultimo cifranan’ disponibel. Pero na mesun momento nan a indica cu ya tin cifranan mas nobo na caminda e siman aki. Y cu e cifranan presenta dialuna tabata di siman pasa.

A base di e presentacion, unda por mira un discrepancia den cifranan y grafiek di epidemia, Bon Dia Aruba atrobe a conclui cu tin un epidemia di Zika na Aruba. Sinembargo Departamento di Salud ta keda para cu ainda no por papia di un ‘outbreak’. Mientrastanto nan mesun cifranan ta indicando esaki.

Banda di esaki Bon Dia Aruba ya tin e informacion nobo caba cu e cantidad di casonan di Zika confirma ta yegando 200. Ademas tin 326 caso probabel di Zika y 250 caso cu ta warda riba un conclusion definitivo despues di un di dos test.