(InfoBae) – Na medida cu e regimen chavista ta aumenta e represion y persecucion contra e oposicion Venezolano y e poblacion civil despues di e fraude electoral di dia 28 di juli ultimo, e comunidad internacional ta redobla esfuersonan pa aumenta e condenanan pa e violencia di e dictadura y pa haya un solucion pacifico na e crisis grave cu e pais Caribense ta pasando.

Den e contexto aki, varios gobierno ta mantene canalnan directo habri cu e autoridadnan chavista pa negosha posibel alternativanan pa haya un solucion pa e crisis. Algun di e esfuersonan ey ta wordo realisa den publico, pero otronan den priva, cu secrecia total.

Aunke e relacionnan entre Caracas y Washington ta keda distante, durante e gobierno di Joe Bode tabatin contacto casi di forma permanente. Segun The Wall Street Journal ta informa, Merca a ofrece e dictador Maduro amnistia como cambio pa e bandona e poder di manera pacifico.

Segun fuentenan familiarisa cu e negociacionnan secreto, e autoridadnan Mericano a mustra dispuesto pa indulta Maduro y su circulo cercano, kendenan ta enfrenta acusacionnan grave di parti di e Departamento di Husticia.

“E gobierno Mericano a pone tur opcion riba mesa pa purba convence Maduro pa e bandona poder prome cu e termina su mandato na januari,” un persona involucra den e combersacionnan a afirma, cita pa The Wall Street Journal.

Di mesun manera, Washington tambe ta dispuesto pa ofrece garantianan di no extradicion na e figuranan principal di e regimen Venezolano, incluyendo e dictador.

Na 2020, e gobierno Mericano a ofrece un recompensa di 15 miyon di dollar pa informacion cu lo hiba na e detencion di Maduro bao e acusacion di “inunda” Merca cu cocaina. E dictador a wordo señala di yuda administra y dirigi e Cartel de los Soles, un organisacion di narcotrafico cu ta consisti di funcionario- y militarnan Venezolano.

E Departamento di Husticia tambe a ofrece recompensa di hasta 10 miyon di dollar pa informacion relaciona cu Diosdado Cabello, number dos di e regimen chavista y pa Tareck El Aissami, ex minister di Industria y Produccion Nacional, ken awe ta deteni na Venezuela.

E acusacionnan di 2020 tambe ta dirigi na Maikel Moreno, ex presidente di e Corte Supermo y pa Valdimir Padrino Lopez, minister di Defensa. Sinembargo, pa nan no tin recompensa.

The Wall Street Journal ta informa cu e combersacionnan a tuma luga di forma virtual pa Jorge Rodriguez, presidente di e Asambela Nacional Constituyente chavista y Daniel P. Erikson, di e Conseho di Seguridad Nacional di Marca.

E intento di Marca di ofrece Maduro un opcion digno ta den liña cu e strategia di oposicion, cu ta mustra dispuesto pa tin negociacionnan cu ta inclui garantia pa e lidernan di e regimen, semper cu nan respeta e transicion pa un gobierno di Edmundo Gonzalez.

Segun e medio, Merca ya a ofrece amnistia na Maduro aña pasa durante combersacionnan secreto na Doha, Qatar, pero e dictador a rechasa discuti cualkier acuerdo cu ta implica su salida for di poder.