(AP) – Comision Federal di Comercio Mericano (FTC) y seis estado di e pais ta demandando Frontier Communications pa no duna e velocidad di internet cu a priminti su clientenan, y cobra nan pa un servicio mas caro y miho di loke nan a haya en berdad.
Den su keho, entrega ayera den corte federal na California, FTC a bisa cu miles di cliente di Frontier a keha cu e compania no tabata duna e velocidadnan priminti. Clientenan a bisa cu nan no por usa e servicio di internet pa e actividadnan online cu nan mester por a haci.
E keho ta trata di loke ta yama DSL internet, un tipo mas bieu di red cu ta wordo manda riba waira di telefon di koper. Companianan di telefon y cable awendia ta construi rednan cu por maneha velocidadnan hopi mas lihe. FTC ta bisa cu Frontier ta provee servicio DSL na 1.3 miyon cliente den 25 estado, principalmente den areanan rural. E tin alrededor di 3 miyon usuario di internet total.
Involucra den e demanda ta fiscalnan di Arizona, Indiana, Michigan, North Carolina, Wisconsin y oficina di fiscalnan na Condado di Los Angeles y Condado Riverside den nomber di California.
Frontier a bisa cu e demanda no tin merito y cu e compania lo defende su mes. E compania a bisa cu su velocidad di internet ‘a wordo articula, defini y describi den e materialnan di marketing’ di forma ‘claro y precies’.
Durante varios aña clientenan a keha di e compania basa na Connecticut, cu a aplica pa bancarota na april 2020 y a sali di su bancarota na fin di april cu 11 biyon dollar menos di debe.
E keho den FTC a nota cu Frontier a resolve cu West Virginia, New York, Nevada, Pennsylvania, Washington y Minnesota den casonan desde 2015, den casonan acusando e compania di incorectamente representa su velocidad di internet. E compania a rechasa cualkier fout.
Presidente interino di FTC, Rebecca Kelly Slaughter, a tweet cu mientras e caso tabata importante, FTC nunca por ‘yena e espacio regulatorio’ laga bashi despues cu Comision Federal di Comunicacion a rechasa e reglanan di ‘net neutrality’ cu tabata supervisa servicio di internet. FCC a rechasa e reglanan bao un presidente nombra pa Trump na 2017. “Supervision activo di e regulador adecua lo por a preveni e violacionnan aki”, el a bisa.
Oficina di fiscal na Minnesota a resolve cu Frontier na juli ultimo tocante posibel practicanan engañoso di cobransa. E compania a bay di acuerdo pa revela su prijsnan na clientenan nobo prome cu nan haya e servicio, y a bisa cu lo paga $750mil den restitucion na clientenan. Tambe a bay di acuerdo pa inverti al menos $10 miyon durante cuatro aña pa mehora su red broadband den e estado. West Virginia na 2015 a rekeri pa e compania gasta $150 miyon pa reforsa velocidad di internet pa clientenan rural como parti di un acuerdo.
Miyones di Mericano no por subi online pasobra nan no tin acceso na internet di velocidad halto of no por paga pa esaki. Administracion di Biden a priminti di combati e ‘division digital’ aki.
