(AP) – Comision Federal di Comercio Mericano a lansa un investigacion riba OpenAI, creador di ChatGPT, riba si e compania di inteligencia artificial a viola leynan di proteccion di consumidor door di elimina data publico y publica informacion falso a traves di su chatbot.
E agencia a manda OpenAI un carta di 20 pagina solicitando informacion detaya riba su tecnologia di AI, producto, cliente, salvaguardia pa privacidad y acuerdonan di seguridad di data.
Un vocero di FTC no tabatin comentario riba e investigacion, cual prome a keda reporta pa The Washington Post riba diahuebs.
E documento di FTC cual e Post a publica a bisa OpenAI cu e agencia tabata investigando si a “comete practicanan inhusto of engañoso riba privacidad of seguridad di data” of practicanan cu ta daña consumidornan.
Fundador di OpenAI, Sam Altman a tweet decepcion cu e investigacion a keda revela den un “leak”, notando cu no “lo yuda crea confiansa” pero a agrega cu e compania ta bay traha cu FTC.
OpenAI a enfrenta scrutinio den otro areanan. Reguladornan Italiano temporalmente a blokea ChatGPT pa preocupacion pa privacidad, y vigilantenan di privacidad na Francia, Spaña, Irlanda y Canada tambe ta poniendo mas atencion, incluyendo algun cu a lansa investigacionnan despues di ricibi keho.
E movida di FTC ta un menasa regulatorio serio na e industria nasciente pero creciendo rapidamente di AI, maske no ta e unico reto cu e companianan aki ta enfrentando.
Comediante Sarah Silverman y otro dos autor a demanda tanto OpenAI como compania mama di Facbeook, Meta pa violacion di derechonan di autor, alegando cu a train e sistemanan di AI di e compania ilegalmente door di expone nan na setnan di data conteniendo copianan ilegal di nan trabao.
Diahuebs, OpenAI y Associated Press a anuncia un acuerdo bao cual e compania di AI ta bay haya un licencia pa e archivo di noticia di AP.
Altman a bin dilanti como un embahador global pa AI despues di su testimonio dilanti Congreso Mericano na mei y un tour mundial subsecuente, incluyendo na Europa, unda oficialnan ta poniendo e tokenan final riba e prome reglanan comprensivo pa AI na mundo.
E regulacionnan ta bay enfoca riba asuntonan di riesgo manera accion predictivo di polis y scoring social, y ta bay inclui provisionnan pa AI generativo revela cualkier material cu derecho di autor cual a usa pa train su algoritmonan.
Altman mes a haci yamado pa regulacion pa AI, maske usualmente e ta enfatisa menasanan existencial dificil pa evalua, manera e posibilidad cu sistemanan di AI super inteligente por algun dia lanta contra humanidad.
Algun persona ta argumenta cu enfoca riba e “relato di ciencia ficcion” lehano di un AI super poderoso lo por hacie mas dificil pa tuma accion contra dañonan ya existente cu ta rekeri pa reguladornan bay mas profundo riba transparencia di data, comportamento discriminatorio y e potencial pa engaño y desinformacion.
“Ta e miedo di e sistemanan aki y nos falta di comprension di esakinan loke ta haciendo cu tur hende tin un ‘freakout colectivo’”, segun Suresh Venkatasubramanian, un cientifico di computer di Brown University y ex-director assistent pa ciencia y husticia na e oficina di Cas Blanco pa Politica di Ciencia y Tecnologia, a bisa AP na mei. “E miedo aki, cual no tin base, ta un distraccion di tur e preocupacionnan cu cual nos ta luchando actualmente.”
Noticia di e investigacion di FTC riba OpenAI a keda revela apenas algun ora despues di un audiencia combativo di Comite Congresional Hudiciario den cual presidente di FTC, Lina Khan a enfrenta contra legisladornan Republicano kende a bisa cu e ta demasiado agresivo den persigui companianan tecnologico pa acusacionnan di mal actuacion.
Republicanonan ta bisa cu e ta acosando Twitter desde su adkisicion pa Elon Musk, arbitrariamente demandando companianan grandi di tecnologia, y nengando pa retira su mes di cierto casonan. Khan a pusha back, argumentando cu mas regulacion ta necesario mientras e companianan a crece y cu conglomeracion tecnologico por daña economia y consumidornan.
