FTA y Holiday Inn Hotel a firma CAO pa e siguiente tres aña

Ayera mainta a tuma luga firmamento di un CAO nobo entre Federacion di Trahadonan di Aruba (FTA) y Holiday Inn Hotel Aruba. Presidente di FTA, Hose Figaroa, vice-presidente di e federacion, Rudy Geerman y General Manager di H.I.M. NV, Simone Farci, a elabora ariba diferente punto importante di e CAO.

Di parti di FTA, Figaroa a indica cu nan ta hopi contento y satisfecho cu e logro di e CAO cu nan a yega na dje. El a remarca cu no semper e negociacionnan pa yega na e firmamento tabata facil, pero a pesar cu tabatin momentonan caminda cu e situacion a pega un poco, nan a logra sali afo di un forma exitoso y cu tur hende ta contento.

Figaroa a subraya cu tambe cu na momento cu FTA a bay na e miembronan pa aproba e CAO, algo cu nan ta haci den cada negociacion, casi un 100% di e miembronan di e sindicato a vota na fabor di e contenido di e CAO aki.

“Pues nos por bisa cu ta un CAO cu ta conta cu e aprobacion di e miembresia completo y sigur tambe di nos como directiva di FTA”, Figaroa a bisa. Na mesun momento el a gradici e ekipo negociado di Holiday Inn cu ta consisti di e General Manager y tambe di e director di recursonan humano cu, segun el a indica, a haci tur nan esfuerso pa e partidonan por a yega na otro.

“Interesante ta pa menciona cu FTA y Holiday Inn tin un relacion di hopi aña. Nos no ta papiando di 5, ni 10 ni 20, nos ta papiando di mas di 50 aña di CAO cu ta wordo firma entre e organisacionnan aki. Pues nos ta hopi contento, hopi satisfecho di e hecho cu nos ta continua e bon relacion aki cerando un biaha mas un CAO cu ta satisfactorio y na beneficio di tur esnan envolvi”, Figaroa a agrega.

Pa loke ta trata recuperacion di e industria hotelero, specificamente aña 2021y comparando cu e lunanan cu tin te aworaki di aña 2022 y expectativanan pa e resto di aña, e presidente di FTA a splica cu 2021 a cera na un punto hopi positivo. “Nos a mira un recuperacion hopi lihe, mas lihe cu cualkier experto a spera cu Aruba lo recupera”, el a enfatisa.

Pero na principio di aña aki manera ta conoci e recuperacion a cay un poco door di e variante Omicron cu a causa un impacto basta grandi riba e prome tres lunanan. Figaroa a sigui splica cu e prome kwartaal di aña ta uno crucial pa tur hotel na Aruba como cu e ta e curason di temporada halto. Pero el a anuncia cu nan ta contento di bisa cu mientras tanto e cifranan ta mustrando hopi miho pa loke ta e recuperacion di e sector hotelero.

“E recuperacion ta hopi satisfactorio y nos ta spera cu e crecemento aki lo sigui y cu pronto nos lo ta back na cifranan di 2019 cu tabata un aña excepcionalmente bon pa Aruba”, el a expresa.

Rudy Geerman, vice-presidente di FTA y e persona encarga cu e negociacion di e CAO aki a indica tambe cu e negociacion entre e partidonan no tabata facil. Den dos ocasion, segun el a conta, locual cu nan a negosha a wordo rechasa, “pero semper cu e meta cu e interes general mester sali pa dilanti y na final nos a logra toch”.

Geerman a splica cu e CAO aki ta un contrato colectivo cu duracion di tres aña. E CAO tin un 8% di aumento cu lo wordo reparti den tres aña y el a menciona cu a mehora algun beneficio tambe.

Un beneficio cu el a indica e trahadonan a purba logra pa varios aña ta uno unda e managernan tambe tabata cay den e sistema di 15% service charge y nan tambe tabata wordo paga for di e pot aki. Den e caso aki, el a sigui splica, nan logra convence gerencia cu ta miho na e momentonan aki pa compania paga e managernan y no saca e placa for di e pot di 15% di service charge pasobra asina e trahado lo por haya mas placa.

El a menciona tambe cu tin mehoracion pa loke ta trata condicion den e area di housekeeping. Y tin otro condicion cu a wak mehoracion ta uno na unda cu dependiendo di e añanan di servicio di e empleado, esaki lo por ricibi un poco mas di aumento.

Simone Farci, General Manager H.I.M. NV, tambe presente a expresa cu como empresa y compania nan ta hopi contento cu e CAO. El a indica cu e negociacion tabata uno largo, pero cu manera semper den cualkier negociacion tin hopi punto pa discuti.

“Den mi opinion nos a yega un hopi bon acuerdo pa tur dos partido y awe nos ta bay firma finalmente pa asina nos tin algun aña exitoso hunto. Masha danki di berdad mi ta aprecia boso compromiso y apoyo den e negociacion aki”, Farci a señala.

Tocante e proceso negociacion, Farci a remarca cu un proceso asina nunca ta facil y nan mester considera tambe hopi punto. El a subraya cu e pais ta saliendo for di un periodo di pandemia y no tabata facil pa tur nan coleganan y pa e compania tampoco. Pa e rason, aki el a bisa, por ta e proceso tabata un poco mas dificil cu un negociacion normal, “pero si mi ta kere nos a yega un acuerdo hopi importante y exitoso”.

Ariba e tema di retonan cu e hotel o por enfrenta el a señala cu e reto aworaki ta pa sali di e pandemia, particularmente pa e prome kwartaal di e aña aki cu ta finalisando pasobra e variante Omicron a afecta hopi di e prome kwartaal y manera a wordo menciona caba pa Aruba, y hopi di e destinacionnan den Caribe, e prome kwartaal ta e periodo mas importante di e aña.

“Pero nos ta mirando pa dilanti pa un hopi bon temporada di zomer, kiermen nos ta spera nos por yega algun di e mesun nivelnan di aña 2019 y kisas pa proximo aña bin back fuerte”, el a finalisa.