FTA: Tarifa obligatorio pa recoge sushi si tabata social

Sindicalista di FTA, Rudy Geerman a reacciona riba e situacion cu a surgi cu introduccion di cobramento obligatorio di sushi di parti di Serlimar, cu na final  gobierno a dicidi di pospone esaki diabierna ultimo.

Alomenos e no lo a drenta na vigor 1 di juli ultimo y tampoco e aña aki, mirando e malcontento cu esaki a causa den comunidad.

Diferente critica a bay den direccion di FTA, te hasta for di e sector sindical,  pa su rol den e introduccion di e tipo di cobramento aki.  Nan mes cu a sostene FTA den e lucha pa introduci un tarifa social, nan a sinti nan a wordo marginal na final di e proceso aki.

Sinembargo, sr. Geerman ta haya cu a yega e momento cu e gremio sindical ta consciente cu ora gobierno kier a introduci un tarifa di 25 florin,  FTA tabata e prome sindicato cu a bisa cu no por. FTA  no ta haya husto, cu por ehempel un persona cu ta gana un salario minimo, mester paga e suma aki. Mientras otro nan cu ta paga mas cu 10 mil florin, tambe ta paga 25 florin.

Gremio sindical
Sr. Geerman  ta corda cu e tempo aya -ainda como presidente di FTA-  nan a yama entre cuater pa cinco reunion cu tur sindicato, y tres sindicato so a presenta, SIWA, UEA y Alvast. Tambe OPPA a yega di presenta pa atende algun di  nan reunionnan. Despues Simar no a bin mas. Tambe ora presidente di OPPA a bay, nan no a tende nada mas di e organisacion aki,  segun e sindicalista.  E no tin nada contra presidente di Simar, ya cu e ta haci su trabou como sindicalista. Pero eventualmente e mester ta mas informa riba henter e proceso aki y kico a pasa.

“Di  tur sindicato cu a wordo yama, a nos ta esun cu a  sali padilanti. Ningun otro mas, cu tur respet pa otro, nan no a bisa nada”, e di. Nan a yega di reuni den varios ocasion cu e minister di e gobierno anterior, pero no a logra un suma. E ta haya cu aworaki cu e gobierno actual kier tuma e asunto aki bek, y nan tabata dispuesto pa sinta cu e sindicato FTA cu ta esun cu tabata den e proceso pa haya un tarifa social.

P’esey FTA a wordo yama, segun sr. Geerman. E no sa pa kico FTA ta wordo cuestiona,  ya cu esaki no ta un proceso cu ta canando awor. Sino cu esaki ta un proceso cu ta data di cuater aña pasa. E ta haya cu fei e tempo haya, niun hende a expresa debidamente nan opinion. “Pero awor cu e ta cla, awor si nan ta bisa.” E ta haya cu e tipo di situacion aki mester stop, ya cu e no ta conduci niun caminda.

Tambe el a referi riba e criticanan a bin riba e sistema di tarifa cu e mandatario encarga cu Serlimar,  kier a introduci. FTA tabata esun cu den gobierno anterior a pidi pa comunidad abstene di paga Serlimar, te ora cu bin cu un tarifa social. Sinembargo e critica cu a bin cu e top maximo di 90 florin como tarifa di Serlimar su servicio,  ta masha leu di ta un tarifa social, segun e criticanan formula.

E veterano sindicalista ta haya cu e tipo di criticanan den direccion di FTA no tin base. Sr. Geeman ta haya cu berdad tabatin varios sindicato cu a sostene FTA, pero na final practicamente nan a laga FTA su so den e lucha aki. Awor cu a busca un forma pa sali fei impasse aki, e ora ey e sindicatonan aki a lanta bek pa critica loke FTA a logra.

E ta haya cu critica ta e cos mas facil pa haci den mundo. “Para un banda y ora cos ta cla, anto bisa cu ta bon of cu e no ta bon, y cu ta falta cosnan”, e di. P’esey  ta cuestiona e criticanan cu a wordo lansa den direccion di FTA, ya cu ora nan a yega di yama den pasado pa atende reunionnan rond di e topico aki, niun hende a bin. Pero considerando cu FTA so a bin, pues nan so a bay pa atende e asunto aki cu gobierno.

Cobramento obligatorio
Sr. Geerman  a bay bek cuater aña pasa, ora cu e gobierno anterior a anuncia cu nan kier stipula un tarifa pa e servicio cu Serlimar ta duna nos comunidad. Pero e ley riba su mes, FTA a boga  cu nan kier papia riba dje. Esaki pa motibo cu e ley a wordo introduci 11 aña pasa,  tempo cu ex minister Booshi Wever, bou gobierno di MEP  a anuncia un tarifa di 10 florin.

Sr. Geerman ta bisa cu fei e tempo aya, e ley mes ta bisa cu tur hende mester paga. Pues di e forma aki e kier aclaria, cu e asunto di cobramento obligatorio pa tur parcela of puntonan di recogemento di sushi den henter Aruba, tabata hinca den e ley caba.

Otro punto segun e sindicalista ta, cu na momento cu e tempo aya a bin cu e ley aki,  e negoshinan priva di recoge  sushi domicilio a bini. Esaki a pesar cu nan tabata na haltura di e ley aki cu ta stipula cu e hendenan ta obliga di paga Serlimar. “Kiermen, esaki no ta nada nobo!,” e di. E tempo cu gobierno di MEP a bin cu e ley aki, AVP a vota contra di esaki, el a bisa.

Sinembargo 4 aña pasa cu e gobierno di AVP kier bin cu e ley aki bek, e ta haya cu nan mester a bin cu e cambio pa aboli e pago obligatorio, ya cu nan a yega di vota contra di e ley. Pero esaki no a wordo haci. Ademas, e ta sigui bisa, cu e ley aki a wordo pasa den parlamento, y si nos organo legislativo ta kere cu no ta corecto, su deber ta pa cambi’e. “A nos no a traha riba e ley. A nos a traha solamente riba e tarifa social”, e di.

Mientras cu e suma cu e gobierno anterior  kier implementa cuater aña pasa  tabata di 25 florin,  si e mester a bay door, tur hende mester a page, ya cu niun hende a cambia e ley,  segun e sindicalista.  El a splica cu FTA den nan combersacion cu e mandatario encarga cu Serlimar, a purba di bin cu un  tarifa social, unda e dak di e tarifa ta 90 florin. Kiermen esun cu tin mas entrada ta paga mas te hasta un maximo di e suma ey.

Mientras cu esun di menos entrada ta paga menos cu esey. Por ehempel, si un famia no tin mas cu 20 florin di entrada pa luna, e no por paga nunca 90 florin. Mientras e ta haya cu den un forma eroneo cu tur hende ta papia di 90 florin, locual no ta asina, segun e sindicalista.

Tarifa social
A pesar di tur critica, sr. Geerman ta sigui mantene cu e tarifa aki si ta uno social. E ta argumenta cu un 71% di e casnan na Aruba tin un entrada cu ta haci cu nan ta paga 30 florin of menos pa e servicio aki. Igualmente el a indica cu un 11% di e casnan di nos poblacion ta paga cero pa e servicio aki. Ta e hendenan cu ta ricibi algun tipo di ayudo social manera onderstand y un pensioen no lo paga, pero esun cu ta gana riba 8 mil y mas cu esey, ta esun cu lo tin cu paga mas. FTA ta sali for di e punto di bista cu e tipo di tarifa aki si ta social. Ya cu e unico manera cu bo ta paga 90 florin, ta ora cu bo tin un entrada di 20 mil florin of mas pa luna.

Encuanto si e tipo di cobransa aki ta resulta pisa pa nos comunidad, considerando cu a  introduci di e pakete di impuesto di crisisheffing, Of si e ta resulta inhusto pa cuminsa cobra e mesun aña aki,  mirando cu parlamento a aproba un suma extra di 5.4 miyon florin di placa di pueblo den e presupuesto di Serlimar, pa nan por draai financieramente durante 2018. Tocante e puntonan aki,  locual FTA a compronde di e minister encarga cu Serlimar ta,  cu nan a pone placa extra pasobra e compania aki tin gasto extra.

E sindicato aki a pidi pa haya mas informacion riba e asunto aki. Nan ta compronde cu e gobierno anterior a pone un grupo grandi den e compania aki. E sindicato no tin nada contra di e decision aki, ya cu trahado ta keda trahado, pero e grupo aki ta bay den e presupuesto di Serlimar. “P’esey mes nan a pidi mas placa”, el a bisa.  Tambe el a tende cu e grupo aki ta bay traha pa DOW pa haci trabou di embeyece y mantene limpi nos isla,  locual ta importante pa nos pais.