Diamars atardi, hues a duna su veredicto riba un caso cu e compania Manrique Capriles a entabla pa disolve e relacion di trabao di un grupo di empleado representa pa FTA.

Hues a bay di acuerdo pa e compania aki paga e cesantia solamente di e trahadonan aki. E decision aki tabata basa riba e situacion financiero cu e compania a presenta na hues, asina presidente di FTA, Hubert Dirksz a declara na Bon Dia Aruba. Ta trata aki di alrededor di 10 empleado cu awor ta bay forma parti di e grupo mas grandi di persona desemplea na Aruba.

 

E sindicalista a splica cu e compania a bay pa un reorganisacion cu nan a cuminsa na april caba. Pero prome cu esey, gerencia tabata papiando di haci cambio den nan compania caminda nan ta pasa e linea di productonan cu no ta famaceutico (remedi) pa laga nan bay pa otro compania.

E compania Manrique Capriles a keda solamente cu e productonan di remedi cu ta mas restabel pa nan actualmente. E hendenan cu ta traha den e parti cu no ta di producto farmaceutico, nan a ofrece un retiro, pero cu pago di cesantia so.

Dirksz a bisa cu normalmente den un reorganisacion asina, hues no ta duna un pago di cesantia so. Sino cu e trahado por haya mas, ya cu e compania ta reorganisa. Pero den e caso aki e situacion financiero di e compania a hunga un rol hopi grandi. Na comienso tabata trata di un grupo di mas cu 20 trahado, y na final rond di 10 hende a keda cu a dicidi di warda te ultimo momento.

Presidente di FTA a indica cu tin diferente motibo cu a conduci cu e compania Manrique Capriles ta confronta problema financiero di cual nan no tin prueba den nan man. Pero FTA ta na haltura cu e compania a registra hopi perdida dor di mal maneho interno y te hasta tabatin caso di ladronicia di hopi placa. “Esey a haci cu e compania a bay atras tanto na Aruba y Corsou, y otro parti di nos region.

Pago di bonus

Otro situacion cu a surgi actualmente net den e temporada aki, ta cu e compania aki a dicidi di no paga bonus. “Nos a haci esey, no na su luga,” el a bisa. FTA ta consciente cu e compania ta hayando subsidio di salario, pero nan no tin informacion cuanto subsidio nan ta hayando.

Pero e punto cu FTA ta para pe ta, cu den todo caso tin un acuerdo den e contracto colectivo (CAO) cu ta bisa cu bonus mester wordo paga. E sindicato aki a tuma e posicion pa tur caminda cu tin problema finaciero pa cualkier motibo, pa e pago di bonus wordo reduci for di un 80% te un 50%.

El a trece como ehempel si e trahado ta traha pa un salario di 80%, ta husto pa nan haya un 80% di bonus pa cumpli cu e CAO. E sindicalista ta compronde cu tin compania cu tin e hopi mas dificil, y asina mes nan ta duna un 25% di bonus. “Bo sa!… algo ta algo,” el a bisa.

Potret di archivo.