Den un carta cu Federacion di Trahador Arubano (FTA) a manda pa Citgo Aruba Refining NV (CAR), y comparti cu prensa, e sindicato ta informa cu lo aumenta presion via accion pa awemainta 7:00am, cu ta bay di ‘slow down action’ pa ‘protest action’.

Tambe e sindicato ta insisti den su posicion cu e compania mester acepta cu ta trata di un traspaso di un empresa y cu por lo tanto CAR mester informa e empleadonan debidamente tocante proximo operador di e empresa. Tambe ta referi na e hecho cu CAR den su ultimo carta di 3 di januari ta bisa cu RDA y gobierno di Aruba ta mantene e posicion cu CAR mester retira y paga tur empleado (segun ley laboral di Aruba).

Pa loke ta e asunto di informa e empleadonan tocante e proximo operador, FTA ta keda mantene e posicion cu CAR mester informa nan encuanto e operador aki, pasobra esey ta loke ley laboral di Aruba ta dicta. Legislacion ta pone e peso di informa e empleadonan debidamente tocante nan futuro empleo, riba e empleador saliente, segun FTA.

Tambe FTA ta bisa cu nan a haya informacion cu CAR y RDA ta den e fase final pa yega na un ‘Temporary Suspension Transfer Agreement’. Segun FTA, firmamento di e acuerdo aki no lo tin acuerdo definitivo encuanto futuro di e empleadonan despues di e fecha di traspaso y CAR lo ta violando severamente su obligacion legal di actua como un empleador di bon reputacion y lo ta responsable pa e daño causa na e empleadonan cu por surgi di e accion aki. E empleadonan , y e sindicato, lo no acepta firmamento di cualkier acuerdo final si no tin un contesta cla encuanto nan futuro empleo.

Tamb FTA ta informa CAR cu nan lo cambia di un ‘slow down action’ pa un ‘protest action’ y ta demanda di e compania cu esaki ta desisti di firma cualkier acuerdo di transferencia cu RDA y/o gobierno di Aruba, te ora esakinan provee contesta concreto encuanto futuro operacion di e refineria y e terminal di petroleo y futuro empleo di e personal. E protesta lo keda efectivo te ora cumpli cu e demanda di e sindicato.

Manera indica den su carta anterior, e sindicato ta enfatisa cu, aunke e propuesta di CAR pa terminacion di empleo no ta contene mas cu e minimo compensacion cu ley ta ofrece, y ta leu di ta comparable cu e paketenan ofreci anteriormente na empleado cu a perde trabao bao circunstancianan comparable, no ta posible negocia cualkier pakete di retiro si no tin un contesta cla si e empleado afecta tin e posibilidad di continua su empleo cu e compania cu lo tuma encargo di e operacion di CAR.