– Ainda reapertura di refineria su efecto riba nos economia no ta wordo mira, asina e sindicalista y ex-presidente di FTA, sr. Rudy Geerman a bisa.
E ta kere cu ta prematuro pa papia riba influencia di presencia di Citgo riba desaroyo di nos economia; ya cu “apenas awor” nan a drenta e refineria.
“Riba papel berdad tin reapertura di e refineria, pero den practica nos no ta mire ainda “, asina e sindicalista di FTA a bisa cardinalmente.
Tampoco ta conoci si Citgo a cuminsa paga y cumpli cu e compromisonan adkiri dor di e acuerdo cu a keda firma cu gobierno di pais Aruba pa medio di su compania estatal Refineria di Aruba (RDA). “Mi no sa si nan a cuminsa paga huur”, el a bisa.
Tambe el a referi riba tereno laboral caminda –segun sindicalista Geerman- ainda e trahadonan den e caso aki hopi di nan no a cuminsa haya trabou ya cu asina e placa por lo cuminsa draai den nos economia.
E acuerdo entre Citgo cu pais Aruba ta un realidad, pero te ainda nan no sa cuanto trahadonan ta trahando actualmente den e refineria caba. “Esaki ta algo cu nos no por contesta?”, el a bisa. Sr. Geerman a agrega cu e factor laboral ta un empuhe pa economia por crece.
E ta kere cu e efecto economico cu e reapertura di e refineria lo trece cu ne, kisas nos no ta bay mire aki denter di dos pa cuater luna. Pero na e momentonan aki nada di nada, segun Sr. Geerman di FTA.
Firma y negociacion CAO
Mientras di otro banda el a laga sa cu FTA a yega di firma recientemente varios Contracto Colectivo (CAO )y ta negoshando otronan prome cu fin di aña yega. Siman pasa nan a termina cu tres CAO, entre nan cu Cool Casino. Y ainda tin ocho CAO mas cu nan ta negoshando den e mesun momento; y e ta spera cu prome cu dos luna nan lo wordo firma nan.
Tambe diamars ultimo nan a cuminsa negosha cu Green Holding caminda e Divi hotel ta cay, unda nan ta negoshando cuater CAO. “Kiermen ta basta trabou ta pasando durante e ultimo dianan aki”, sindicalista Geerman kende ta encarga cu negociacion di CAO pa FTA a bisa.
E tipo di negociacion aki no uno ta facil, ya cu mester tene cuenta cu tur dos banda di partido. “Locual trahado ta pidi y tambe locual cu compania por carga”, el a bisa. A base di esey nan ta trece un balans, caminda na final e trahado ta dicidi di acepta of no e CAO nobo.
