ORANJESTAD – Vice presidente di FTA, Tyrone Bremo, a lamenta cu mayoria di e trahadonan di The Mill Resort no a vota pa e sindicato aki sigui representa nan durante e referendum cu a tuma luga dialuna atardi. E ta haya e resultado aki un lastima ya cu e compania aki no ta bay gosa di un representacion sindical.
E sindicalista a bisa cu e sentimento aki no ta agradabel pasobra dos aña pasa FTA a gana un referendum pa representa e trahadonan di The Mill Resort y asina cuminsa negosha un contracto colectivo cu nan dunado di trabou. “Hopi tempo y hopi ora a wordo hinca pa purba yega na un contracto colectivo.”
E sindicalista a haya cu e compania a uza su tacticanan di prolonga e proceso di negociacion di e CAO, y e ultimo cu nan a haci ta pidi un referendum. Ki factor por a hunga un rol pa e resultado di e referendum aki a bira otro desfaborabel pa FTA compara cu dos aña?. E ta haya cu si nos por wak cu e prome biaha FTA a gana e referendum cu mayoria absoluto y aworaki e resultado ta otro “bo por deduci facilmente cu e compania a haci su trabou pa convence hendenan di vota di e forma aki.” E ta spera cu kico cu ta cu e compania a priminti e trahadonan, pa nan cumpli cu ne.
Den e referendum aki un total di 52 trahado por a vota. Di e total ey por lo menos 12 trahadonan tabata cu vakantie, mientras cu pa alcansa e mayoria, FTA tabatin mester di e mita plus uno di e total di 52 trahado. Pa FTA por sigui representa e trahadonan legalmente, e sindicato tabatin mester di 26 voto na nan fabor of mas di e 52 trahadonan cu tabatin derecho di vota. Esaki sin importa cu un grupo considerabel di trahado ariba e lista di votamento a bay cu vakantie. Na final un total di 36 trahado a haci uzo di nan derecho di voto di cual un grupo grandi a vota (mas cu 20) pa niun sindicato; y menos a vota pa FTA.
