A pesar di e yamada cu sindicato STA a haci pa e trahadonan di aeropuerto (AAA N.V) abstene di vota den e referendum solicita pa FTA, mayoria di e trahadonan a bay haci uzo di nan derecho, y nan a vota na fabor di FTA, cu tabata e unico sindicato cu a participa den e referendum.

Ayera tardi unabes cu e referendum a cera pa 3:30pm y e contamento di voto a tuma luga, Mediador di Gobierno, Anselmo Pontilius a duna e resultado. El a bisa cu den principio tabatin 173 trahado cu derecho di voto y na final a conclui cu tabata 172.

Di e total di trahadonan aki, 104 a haci uzo di nan derecho di voto. Di e total di 172 trahado pa FTA por representa nan –di acuerdo cu ley di referendum– nan mester di un 50% mas 1%, cu den e caso aki ta mas cu 87 trahado. Di acuerdo cu e resultado, di e total di 104 persona cu a vota, 93 a vota pa FTA, 3 a vota blanco y 5 a vota pa niun sindicato y 3 voto a resulta invalido.

Mirando e resultado, Mediador di Gobierno a bisa cu legalmente sindicato FTA –segun ley di referendum– ta bira e sindicato mayoritario di cual dunado di trabou tin cu atende cune.

El a splica cu den e caso aki, e dunado di trabou tin un obligacion di sinta cu e sindicato mayoritario pa negosha e proximo contract colectivo (CAO) y atende cu asunto di e trahadonan, etc. Tambe e dunado di trabou por sinta cu e sindicato cu tin menos miembro, pero e no tin niun obligacion legal pa negosha cune. Den pasado a yega di sosode cu tin compania cu ta respeta e derecho di otro parti pa sinta cu e sindicato cu tin e minoria riba asuntonan cu ta concerni na nan miembronan.

Igualmente el a referi cu den e caso di negociacion di CAO pa e trahadonan di aeropuerto, sindicato STA cumpliendo cu ley, y di acuerdo cu e CAO vigente, a base di e periodo cu nan tin pa informa e dunado di trabou, nan a manda informa cu nan kier negosha un CAO. Awor cu FTA a gana e referendum di ayera, Pontilius ta sali for di e punto di bista cu nan ta bay riba e mesun direccion di presenta un proposicion di CAO, unabes cu FTA ta scucha e trahadonan prome. Nan por cuminsa negosha debi cu e CAO actual ta vence na luna di december 2019, y generalmente nan ta cuminsa negosha prome cu e ta caduca, locual ta recomendabel, segun Mediador di Gobierno.