Federacion di Trahadonan di Aruba (FTA) cu ta representa parti di e empleadonan di Citgo Aruba Refining NV, a manda ayera un carta pa PDV Holding Inc, cu ta e holding mayor na Merca cu ta coordina y supervisa tur operacion di e empresanan Citgo, di cual e holding ta e accionista final.

Despues di splica e situacion actual na Aruba, e sindicato ta pidi intervencion di e holding pa su subsidiario na Aruba cumpli cu su debernan legal pa cu e empleadonan. Segun e carta, FTA y e empleadonan tabata bao di e impresion cu lo a maneha un pakete di retiro similar na esun ofreci na februari 2019 na un cierto cantidad di empleado. Sin embargo, awor Citgo Aruba ta ofrece su empleadonan un pakete cu segun FTA ta substancialmente menos cu e pakete anterior. Ademas, e compania ta duna preaviso di terminacion di contrato contra ley, pa dia 30 di januari proximo.

FTA (y IOWUA) a trata di negocia cu Citgo Aruba encuanto su oferta actual, pero e compania lo a declara cu nan ta dispone solamente di fondo limita y por lo tanto no por ofrece e mesun pakete di 2019. Segun declaracion di e compania nan no por haya tampoco fondo adicional di PDV Holding pa atende e asunto aki di otro forma.

FTA ta bisa cu esaki ta un actitud cu nan no a spera di un compania responsabel cu ta subsidiario di un compania di bon reputacion manera PDV Holding, ademas cu e empleadonan na tur luga merece di ser trata hustamente segun principio, ley y regulacion laboral. Ta constata cu Citgo Aruba ta viola leynan laboral di Aruba y den esey ta desrespeta tanto e trahadonan como comunidad di Aruba.

FTA ta haya e actitud di Citgo Aruba, di “my way or the highway” repudiable y no hustifica. Ta haci un apelacion riba PDV Holding pa provee e fondonan adicional necesario pa percura pa e compensacion financiero adecua den e caso aki.

Copia di e carta a bay entre otro tambe pa presidente interino di Venezuela, gobierno di Aruba, RDA NV, mediador di gobierno.

Nota di redaccion:
Entre Citgo Aruba Refining NV y PDV Holding Inc tin dos otro holding; esun directamente riba Citgo Aruba ta Citgo Aruba Holding LLC y esun riba esaki ta Citgo Holding Inc, cu ta subsidiario directo di PDV Holding, cu na su turno ta subsidiario directo di Pdvsa. Tur e holdingnan ta entidad Mericano. Henter e consorcio aki ta cay bao maneho di gobierno interino di presidente interino Juan Guaido.