FTA ta bolbe pidi pa no paga tarifa di Serlimar

Sindicato FTA no ta di acuerdo cu e tarifa social cu gobierno a introduci entrante 1 di januari 2017 pa e servicio di recogemento di sushi domestico realisa pa e compania estatal Serlimar.

Pa tal motibo durante  nan ultimo conferencia di fin di aña, secretario di FTA, e veterano sindicalista Rudy Geerman a haci un yamada un biaha mas pa comunidad abstene di paga e tarifa aki ya cu esaki no ta ahusta na e proposicion cu nan a haci na Gobierno pa bin berdaderamente cu un tarifa social.

E ta bisa cu e situacion aki ta un preocupacion cu sindicato FTA  tin for di 2015. E tempo aya nan a manda un proposicion pa gobierno y nan a reuni varios biaha rond di e topico aki caminda nan a ripiti nan proposicion di un tarifa social di 15 florin.

E no ta haya cu nan proposicion ta uno “social”. Kiermen e  mester ta un tarifa cu te hasta esunnan cu tur trahado cu ta gana te cu 2.500 florin tin cu paga 15 florin y den dje ta inclui esunnan cu tin un entrada limita den nos comunidad, manera nos pensionadonan y esunnan cu ta biba di un onderstand.

“Na unda e igualdad ta keda? Di cual tarifa social nos ta papiando”, asina sr. Geerman ta expresa.

Awor gobierno a bin cu un tarifa di 25 florin locual FTA no ta di acuerdo cu esaki. Te hasta sr. Geerman a cuestiona e echo cu ora gobierno di MEP kier a introduci un tarifa di apenas 10 florin pa e servicio di Serlimar, e tempo aya oposicion (AVP) cu ta nos mandatarionan actual a bay protesta te hasta mara nan mes na cadena dilanti di Bestuurskantoor. Awor despues di 8 aña di e gobierno actual 10 florin no ta bon, ya cu 25 florin e mester ta. “Cu cual midi nos ta midi akinan ?” P’esey sindicalista Geerman den nomber di FTA un biaha mas a pidi pueblo “cu no paga niun cen pasobra e ta inhusto”.

E ta bisa cu nan a bin cu e tarifa aki sin ni sikiera reuni cu FTA pa discuti e asunto aki; ya cu prome minister a priminti nan di sinta prome cu nan. P’esey pa nan tabata un sorpresa ora cu nan ta bisa cu e proposicion di nan tarifa social ta sali for di pensamento di FTA. “Mi ta kere cu e pensamento di nos ta leu di locual gobierno a manda.” Cu e mesun rosea Sr. Geerman a declara energicamente cu “nos ta rechasa esaki completamente”.