FTA como organisacion sindical ta abstene di participa den e Marcha Nacional Pa Nos Siguridad cu a wordo convoca pa awe tardi.
Presidente di FTA, Sr. Hubert Dirksz a bisa cu como directiva nan ta kere cu e “gobierno ta fayando” pa loke ta atende cu siguridad.
FTA a yega di sinta den varios ocasion cu e minister concerni, pero te aworaki lamentablemente nan tampoco ta mira mehoracion den e situacion aki.
Pero a pesar cu FTA tin su critica serio contra gobierno cu ta fayando riba tereno di siguridad, e sindicalista Hubert Dirksz a bisa cu nan ta “aprecia y admira e trabou di polis”. Pero di otro di banda FTA ta considera cu e accion aki tin “un tinte politico”. Esaki a haci cu e organisacion sindical aki a dicidi di no participa di e marcha aki.
Sinembargo el a declara cu directiva di FTA ta apoya nan, ya cu e marcha pa protesta contra criminalidad ta na su luga y husto na e momento aki. P’esey mes nan ta kere cu e miembronan di FTA ya sea tambe e bestuur y/of e delegadonan cu ta desea di participa, por haci esaki.
“Pero pa motibo di principionan di FTA y e maneho cu bo ta hiba pa hopi aña, cu na momento cu un partido politico ta yama un accion, nos no ta uni nos mes na dje”, segun presidente di FTA.
Pero el a afirma cu e protesta aki contra criminalidad ariba su mes ta valido. Ademas cu e problema di siguridad mester haya mas atencion.
