FTA speransa ley 1613x (NP).JPG

Ayera mainta FTA a reuni cu e trahadonan di Orchid casino na Centro di Bario Tanki Leerdert, ya cu e compania no kier reconoce e sindicato pa representa e trahadonan. FTA ta adverti awor cu e situacion por bay for di man.

Presidente di FTA Hubert Dirksz ta informa prensa cu mas di dos aña pasa FTA a gana referendum pa representa e trahadonan y FTA a entrega un proposicion pa cuminsa negocia un CAO. Compania a dicidi di lanta caso contra mediador di gobierno pa bringa e presencia di FTA; y dos aña a pasa y gerencia no a sinta cu FTA pa negocia e CAO.

Awor despues di dos aña FTA a bolbe mustra cu e tin derecho pa ser respeta y cu mester sinta na mesa. Pa e motibo aki compania a exigi lista di miembro. Pero compania –segun FTA- a dicidi di haci mal uzo di e informacion aki pa pone presion riba e trahadonan. A pesar di tur esfuerso compania ta haciendo contrario pa asina e trahadonan no wordo representa. FTA ta condena e actitud aki di e dunado di trabou cu no ta contribuyendo na trankilidad laboral un biaha mas.

Sr. Dirksz a manda un carta na gerencia di Orchid casino caminda e sindicato ta laga sa cu e situacion aki por bay for di man di un ora pa otro, y nan ta pone e gerencia mes responsabel di esaki. E sindicato ta keda na spera di un contesta “positivo” di parti di gerencia di Orchid casino. Bon Dia Aruba ta purbando di haya un comentario tambe for di e banda di e casino.