A pesar di e resultado di e referendum di ayera, cu a duna FTA e mayoria di voto pa representa e trahadonan di aeropuerto, Presidente di e sindicato aki, Hubert Dirksz tabata masha prudente pa emiti cualkier expresion di triunfo.

El a bisa cu e referendum a bay bon, y aunke nan ta hopi contento, tambe nan ta basta trankilo. Nan a haya un total di 93 voto, cu ta 6 voto mas di loke nan tabatin mester pa gana e referendum.

Unabes cu e resultado di e referendum aki a wordo conoci, e siguiente fase ta cu FTA lo sigui mantene contacto cu e trahadonan. Tambe nan tin cu eligi e representantenan di e trahadonan y cuminsa busca e solucion pa atende cu e diferente problema di e trahadonan.

Encuanto e negociacion di un contracto colectivo nobo (CAO), mirando cu esun vigente ta caduca na luna di december awor, Presidente di FTA a bisa na Bon Dia Aruba cu e sindicato cu a gana e referendum tin e derecho pa bay negosha cu gerencia di Tripel A N.V.

El a declara cu si tabatin un proposicion di CAO manda, mientras cu tabatin un peticion pa referendum, mester a warda pa e referendum tuma luga pa dicidi cu cual sindicato dunado di trabou ta bay sinta na mesa pa negosha.

“Esun cu bo tin cu sinta na mesa cune ta esun cu a gana e referendum,” el a bisa. Den e caso aki, e ta haya cu gerencia di Triple A tin cu sinta cu FTA y e proposicion di CAO entrega pa otro sindicato (STA) no ta conta, segun Dirksz.

FTA ta considera cu ta mas cu normal cu esun cu ta gana referendum, esey ta e sindicato cu ta haya e derecho legal pa sinta na mesa cu e dunado di trabou. Como presidente di FTA, Dirksz ta haya cu e derecho di e trahadonan mester wordo respeta. “Si e trahadonan ta haya cu ta bon pa opta pa bay na otro sindicato, bo tin cu respeta nan libertad,” el a declara. El a bisa cu esaki ta para den nos constitucion, cu ta defende e derecho di liber asociacion, y no mester stroba ningun hende mester pa haci uzo di e derechonan aki.

E ta lamenta cu esaki a sosode den e caso aki cu nan a pidi y gana e referendum den aeropuerto. Pero igualmente el a laga sa cu FTA a yega di experiencia di perde basta miembro na diferente empresa cu awor ta cerca otro sindicato, y nan tin cu biba cune. Den e caso aki, e ta considera cu como sindicato nan mester por duna e miho servicio posibel pa asina mantene nan miembronan.