FTA: prome parti di aña nobo lo ta uno dificil; Sindicatonan mester tin miho relacion cu gobierno y dunado di trabao

Ya caba a transcuri e prome nuebe dia di 2021 y presidente di sindicato FTA, Hubert Dirksz ta kere cu e prome parti di e aña nobo aki lo ta uno dificil.

Aunke como sindicato cu ta representa mayoria di e trahadonan di e sector horeca, nan ta spera cu e di dos parti di 2021 e situacion interno lo por mehora. Pero e sindicalista ta haya cu nos situacion ta dependiendo hopi di Merca.

Di parti di FTA, ya caba tur e contractonan colectivo (CAO) cu a caduca na 2020 of esunnan cu lo bay caduca na 2021, e sindicato ta extendiendo nan pa un aña, sin aumento salarial. Pero si e sindicato aki ta pone acerca cu dependiendo di e situacion nan lo por evalua kico ta posibel pa considera un aumento salarial.

Pero tambe e beneficionan caminda nan a firma protocolnan pa motibo di Covid pa corta nan den diferente compania. Nan ta pone e decision aki na evaluacion te meymey di aña pa asina dicidi si nan ta mantene e medidanan aki. Of si nan ta anula nan pa bay bek na e normalidad pa keda cu e beneficionan cu ta para den e CAO.

Sindicalista Dirksz a laga sa cu FTA a tuma e decision aki pasobra nan ta consecuente cu si nan ta bay mesa na e momento aki pa negosha cualkier aumento salarial of beneficio, lo ta dificil pa logra algo. Pero tambe como sindicato nan ta haya cu no ta corecto, pasobra nan ta consciente cu e situacion ta dificil pa tur compania.

Sinembargo nan ta kere cu e aña aki tanto dunadonan di trabao y trahadonan mester yega mas cerca otro. Sindicatonan mester tin miho relacion tanto cu gobierno y tambe cu dunado di trabao.

E meta tras di esaki ta esun di mantene calidad di trabao of trabao descende. Tambe pa nan tuma medidanan conhuntamente pa mantene empleo y crecemento economico. Igualmente pa nan traha conhuntamente pa mantene e producto turistico pa asina e turistanan por apreci’e y nan por bin bishita nos isla.

Pero presidente di FTA ta haya fundamental cu 2021 nos por logra crus’e sanamente, y cu un posicion hopi mas cla di e sindicato. E kiermen cu nan por sinta na mesa y conhuntamente por yega na decisionnan importante. Ademas si ta posibel nos mester laga Hulanda compronde cu nos por miho, y nos por laga nan respeta nos pa esey.

E sindicalista ta kere cu pa nos por haya e respet nos tin mester di mustra ta responsabel tambe. Pasobra loke ta pasando por ehempel aworaki cu e comportacion di nos propio hendenan pa laga e contagio di virus aumenta, e no ta un bon muestra cu nos tin disciplina y responsabilidad suficiente. “Asina aki nos no por haya respet di niun hende,” presidente di FTA a declara na Bon Dia Aruba.