Ayera pa medio di un referendum sindicato FTA no a haya e mayoria di voto pa sigui representa e trahadonan di The Mill Resort.

Na final di e referendum aki, Mediador di Gobierno, Anselmo Pontilius a declara na Bon Dia Aruba cu e compania cu ta maneha The Mill Resort ta esun cu a pidi e referendum. Un total di 52 trahado por a vota pero di e total ey, por lo menos 12 trahadonan ta cu vakantie. Mientras pa yega na e mayoria, FTA tabatin mester di e mita plus uno di e total di 52 trahado. Kiermen pa FTA por a haya e mayoria pa sigui representa e trahadonan legalmente, e mester haya 26 of mas di e 52 trahadonan cu tabatin derecho di vota. Un total di 36 trahado a haci uzo di nan derecho di voto di cual un grupo grandi a vota (mas cu 20) pa niun sindicato; y menos a vota pa FTA. “Esey a nifica cu FTA no a haya mayoria pa entre otro representa e trahadonan oficialmente mediante un contracto colectivo”, e mediador a bisa.

Factornan
No ta conoci ki factor (nan) por a hunga un rol den e referendum aki. E ta contrario na e resultado di 2 aña pasa cu FTA a gana e referendum pa representa e trahadonan di The Mill Resort y asina negosha un contracto colectivo (CAO). Nos a puntra sr. Pontilius si e hecho cu un grupo di 12 trahado cu derecho di voto a bay cu vakantie por a hunga un rol den e resultado? El a bisa cu e ley di referendum mes ta determina cu pa un organisacion sindical representa e trahadonan “e mester ta 50% plus uno di esunnan cu tin derecho di vota; independientemente si nan ta cu vakantie of no. Un di e rason cu e gerencia di e resort a splica cu hopi trahado a bay cu vakantie ta pasobra e pensamento tabata cu nan lo cera e hotel aki completamente na luna di juli pa renobacion.

Ademas aunke a wordo expresa e preocupacion cu un grupo di trahado a bay cu vakantie, e partidonan – kiermen tanto e dunado di trabou como e sindicato a bay di acuerdo pa bin cu e referendum aki riba un fecha y un localidad determina. Pues nan a palabra e fecha, ya cu e intencion inicial tabata pa e referendum tuma luga diabierna ultimo, pero a acorda pa pospone pa ayera. E mediador ta splica cu na momento cu ta a reuni cu e partidonan, semper e ta propone pa e referendum tuma luga na oficina di Mediador di Gobierno pa ta mas neutral cu ta posibel. Pero ambos partido a acorda pa esaki tuma luga na The Mill Resort mes.

E sindicato a expresa un preocupacion riba e resultado aki. Sinembargo mediador di gobierno a bisa cu cualkier malcontento di FTA nan tin cu vocifera esaki cerca e dunado di trabou, ya cu den un proceso legal manera e referendum aki, ta e resultado final ta esun cu ta conta.
Tabata existi un ambiente di preocupacion cerca e trahadonan, ya cu e hotel menciona tabata plania di cera. Pero nan no ta cera mas sino cu nan a cuminsa cu un trabou di renobacion, mientras cu e hotel ta sigui cu su operacionnan.