FTA pa Hotel RIU tocante accion di trahadonan: ‘Bo tin cu trata hende cu respet y boso no ta haciendo esey’

Diabierna mainta, medionan di comunicacion a ricibi informacion cu trahadonan di Hotel RIU ta bay protesta, pa mustra nan mal contento cu e compania pa loke ta trata pago di salario.

Na representacion di Federacion di Trahadonan di Aruba FTA, Tyrone Bremo a splica cu despues cu nan a tene varios reunion cu Hotel RIU, referente un protocol cu FTA a manda pa nan firma, caminda cu nan a papia pa paga e 20% extra di salario, FTA a sali for di reunion cu un mal contento grandi. Pa motibo cu e compania no a bay di acuerdo pa atende e protocol debidamente manera mester ta.

Bremo a specifica cu e mesun protocol aki, FTA a manda pa tur compania di hotelnan cu ta afilia na FTA. Nan tabatin un reunion y nan por a yega na palabracionnan bon, pero pa Hotel RIU e contesta ta keda un no. Ta parce segun Bremo a bisa cu nan no a repasa riba e protocol mes y no tin un splicacion logico dicon nan no por a bay di acuerdo cu e puntonan menciona. Y “asina aki simplemente nos no por sigui”, Bremo a sigura.

Despues di e reunion, e trahadonan a sali cu un mal contento y nan a dicidi di tuma accion, pa motibo cu e compania su punto ta cu ta un opcion pa paga 20% y nan a dicidi despues di no haci’e. Bremo a trece dilanti: “Dicon bo ta dicidi riba nos sin ni sikiera negocia of sikiera sinta cu nos na mesa y purba di yega na algo?” Bremo a expresa.

E mesun problema financiero of e mesun problema cu Hotel RIU ta pasando aden, tur e otro hotelnan tambe ta pasando aden. Pero mientras tanto tur esun cu ta afilia na FTA a sinta y nan a yega na un palabracion, e mayoria di nan ta pagando e 20%. “Abo como compania no por pensa solamente riba bo interes y bo saco, nos tambe ta den cos akinan”, Bremo a declara.

Pa loke ta trata ocupacion di Hotel RIU e fin di siman aki, Bremo a comenta cu den ultimo reunion cu nan a haya cu e hotel aki, nan a laga sa cu nan tin un cantidad di hende masha chikito mes drentando. Pa loke el a sigura cu e hotel no ta bay yena den e siguiente dianan. Pero e proyeccion cu e hotel mes tin ta cu gradualmente e lo keda yena, pero nan no tin e informacion precies pa ki dia esey lo sucede.

Tambe el a bisa cu nan a purba di tur manera pa nan por yega na un comprendemento na mesa, cu esaki no ta e prome reunion ni e prome carta cu nan ta manda, pero e contestanan cu FTA a haya “no ta contestanan drechi, bo tin cu trata hende cu respet y nan no ta haciendo esey”, el a señala.

Di mesun manera, tempo cu a informa cu crisis Covid-19 a yega Aruba, cu hotelnan mester a wordo cera pa cumpli cu cuarentena, na e momento ey e trahadonan tabata kier garantisa kico nan lo tin como entrada. E tempo ey FTA a pidi loke nan a pidi pa e otro hotelnan y cu Hotel RIU a logra algo diferente.

Na e momento ey, e compania a bay di acuerdo pa paga un suma di placa cu ta 600 florin pa kinsena te luna di december. Na momento cu a introduci subsidio di salario, unilateralmente e compania a dicidi di stop di paga esey, sin haci un consulta.

Pa finalisa, Bremo a informa cu hotel RIU tin aproximadamente 350 trahado, di e cual 200 di nan ta miembro di FTA.

Di su parti, Dilsia Sabon representante di e trahadonan a duna di conoce pa Bon Dia Aruba cu nan a bay den accion mirando cu e mayoria di hotelnan di Aruba ta pagando su trahadonan desde un 80% te 100% di nan salario, tumando den consideracion diferente factor. “Nos tur sa cu e situacion di Covid-19 ta un situacion cu a afecta rond di mundo, no Aruba so y nos ta consciente di esey. Pero na dado momento, como delegado nos tin cu para pa sostene e hendenan, pa motibo cu cada hende sa kico nan ta pasa aden, den sentido financiero”, el a sostene.

El a comenta cu na cierto momento como delegado e trahadonan a dicidi despues di varios intento pa nan mustra nan mal contento y na Aruba, cu ta un pais democratico y cu nan ta traha den sector hotelero, sigur cu ta un di e gruponan cu mas a sinti loke a pasa na rond di mundo.

Den lunanan aki cu hotelnan no tabatin actividad, Sabon a declara cu nan a haya e subsidio di 60% di nan salario. E luna aki di juli e mayoria di e trahadonan a cuminsa bay hotel pa colabora y traha y hotel a mustra un bon intencion.