FTA no ta di acuerdo con Hulanda a bin cu condicionnan: Pero tin medidanan cu ta necesario pa Aruba

Pa presidente di sindicato FTA, Hubert Dirksz, tin medidanan of condicionnan di Hulanda cu ta necesario pa Aruba. Sinembargo e sindicalista ta haya cu Hulanda ta haciendo un fout di impone asina fuerte riba Aruba, y demas islanan. “E no ta na su luga pa loke nan ta haci.”

E sindicalista ta weita cu pa hopi aña e situacion na Aruba a bay malo debi na mal maneho, malgastamento di placa y patronahe politico. Ademas tin demasiado hende den aparato gubernamental. Tur esey –segun presidente di FTA– mester wordo coregi.

FTA ta un di e sindicatonan cu a participa, hunto cu gremio comercial, den e reunion informativo cu gobierno a organisa diaranson mainta. Den e reunion a wordo papia tocante algun di e condicionnan nobo cu Hulanda a bin cune. Nan ta un pakete di 18 medida cu gobierno mester acepta pa por sigui haya fiansa na cero porciento pa atende cu tur obligacion cu pais Aruba tin.

E sindicalista ta desaproba e forma con Hulanda ta procede. Pasobra nos tur ta partner den reino Hulandes y pa hopi aña nos no ta trata otro di e forma aki. E ta cualifica e forma aki como incorecto. FTA ainda no a wak kico ta e 18 condicionnan cu ta den un documento di 218 pagina cu ta bao embargo. E no ta disponibel prome di e reunion di conseho di minister di Reino awe.

Segun presidente di FTA, awendia den mundo paisnan mester traha hunto, manera nos tin na Europa. Tambe tin diferente tipo di tratado na nivel di continentenan. Pero e tratadonan aki por ehemplo no ta wordo haci pura. Mester evalua prome e condicionnan caminda e paisnan ta bay traha cu otro.

Sinembargo e ta haya cu di e poco informacion cu a sali afo relaciona cu e documento aki, tin aspectonan cu a wordo papia di nan den pasado caba. Pero e ta considera cu nan ta hopi pisa y sigur di embergadura grandi pa bin cu un decision den corto tempo.

Den e caso aki di parti di Hulanda e ta mustra –segun e sindicalista– cu nan kier kita ‘su dolor di cabes’ for di e islanan di nos region. Mientras nos por considera cu Aruba no a duna Hulanda dolor di cabes nunca. E ta kere cu Hulanda no ta contento cu Aruba a haya un Status Aparte cu a dun’e un autonomia grandi.

Pero si e ta considera cu tin situacion cu mester wordo soluciona. Talbes na nivel di Caribe Hulandes nan por wordo soluciona miho, caminda nan por yuda otro, el a laga sa. P’esey Dirksz ta haya cu sin duda medidanan mester wordo tuma. Pero Hulanda no por pusha nan, a pesar di tur e consecuencianan cu por tin pa pueblo.

Na prome luga e sindicalista a bisa cu Aruba mester por tin un tempo pa studia e medidanan debidamente. E di dos ta, con Aruba ta bay tuma e pakete di medida aki. Pasobra seguramente tin medidanan eventualmente nos por tuma. Pero otronan cu nos no por tuma di biaha na e momento aki. Particularmente teniendo na cuenta cu nos ta den un crisis.

Actualmente Aruba ta den un situacion cu nos economia ta paralisa. P’esey e ta cualifica como ‘un locura’ di parti di Hulanda y un falta di respet total di impone un pakete di medidanan pisa.