Aunke minister Andin Bikker (POR) a bisa cu e plan di emergencia economico no ta mishi y tampoco ta haci vulnerabel e derechonan adkiri pa e trahadonan, sindicato FTA no ta mucho confia riba e promesa esaki.
Nan a scucha declaracion di e mandatario cu a yega di expresa cu gobierno no tin intencion pa trece cambio den e ley 1613x. Pero loke FTA a tene cuenta cu e declaracion aki ta e punto di e flexibilisacion laboral. Den e punto aki, sindicato tin un posicion fuerte. Si gobierno, den e caso aki minister Bikker, ta bisa cu esaki no ta e motibo cu nan tin su tras, ‘ta bon pa mantene su mes na palabra pasobra sigur FTA y e otro sindicato sigur no lo acepta esaki’, asina e sindicalista y presidente di e sindicato aki, Hubert Dirksz a bisa.
For di São Paulo (Brasil), sr. Dirksz kende a participa den e prome reunion di e Hunta Directiva Continental Sindical di America, a declara na e matutino aki cu nan no tin un bista concreto riba cual direccion e gobierno kier bay cu e plan aki pa reactiva nos economia. Sinembargo como sindicato nan a yega di duna nan posicion basta cla. Loke si FTA a ricibi ta un carta for di gobierno caminda nan ta informa FTA riba nan contribucion pa nan plan di rescate y recuperacion economico y financiero.
Eynan FTA a wordo informa cu lo tin algo similar na e plan cu a tuma luga na Hulanda. FTA a bay averigua mas riba e experiencia di Hulanda den esaki, y nan por a haya cierto preocupacion. “Nos no lo acepta pa un crecemento economico, aumento di productividad laboral, aumento di empleo, treciendo e posicion di gobierno conhuntamente cu dunado di trabou pa flexibilidad laboral”, e sindicalista a bisa.
No por bay atras
Independiente di e medidanan cu gobierno lo por bini, FTA ta haya cu mester percura cu economicamente nos no ta cay atras. Sino cu economicamente nos mester keda fuerte pa mantene un stabilidad den nos pais cu lo contribui pa mantene e calidad di bida di nos comunidad, y tambe pa e situacion financiero di Aruba mes.
FTA ta compronde cu flexibilidad laboral ta loke nan a yega di bringa den pasado contra e cambio di ley di e articulo 1613x di nos codigo laboral. FTA ta haya cu un cambio riba e ley aki ta incorecto, pasobra bo no por duna e trahado un trabou pa tempo cortico pa un funcion na termino largo. E sindicalista a indica cu e trabou di tempo cortico mester ta pa e hendenan traha segun e ley 1613x . Nan no ta mira motibo pa bin cu cambio riba e ley aki. Nan ta mira cu hopi pais ta pasando den problema pa cambio di ley asina.
Ademas e ta haya cu gobierno tin cierto prioridad actualmente pa atende cu esaki, prome cu e tipo di cambio riba situacion laboral. Entre nan, gobierno tin cu atende cu su problema financiero. Tambe nan tin cu atende cu e problema social y criminalidad cu nan no por neglisha. Segun e sindicalista, un aspecto cu mester pone extra atencion ta esun di e problema social riba nos isla, ya cu e ta afecta nos economia y na su turno e ta causa mas daño pa nos situacion financiero di pais Aruba.
