FTA nan punto di salida ta pago di salario y garantia di trabou

Fei siman pasa y ayera tambe nan  ta reuniendo cu e grupo interesa pa opera e casino di Barceló Hotel (ex Occidental hotel).

Nan ta haciendo calculo  y inversion haci mientras cu e trahadonan representa pa sindicato FTA ainda ta den incertidumbre y necesidad, ya cu mayoria di nan no ta trahando y nan tin tres luna sin salario.

Presidente di  FTA, sr. Hubert Dirksz ta haya tur e asunto aki un falta di seriedad. Ainda no tin oficialmente un operador nobo pa e casino, sino interesado. Durante e reunion di ayera mainta cu participacion di Mediador di Gobierno, Abogado di e grupo interesado y FTA su abogado, pero ainda no tin nada concreto riba ki dia e casino aki ta bay habri.

E lider sindical, sr. Dirksz a declara na Bon Dia Aruba cu nan ta dispuesto pa busca un solucion teniendo na cuenta e situacion di e trahadonan cu nan ta representa. Segun FTA di e grupo di 44 trahado cu a keda sin trabou ora cu e casino a cera su porta luna di december pasa, solamente 5 pa 8 trahado a haya algo, pero e ta un trabou temporario of parttime.

Punto di salida

E sindicalista a rechasa cualkier proposicion riba e  posibilidad pa declara e casino bancarota. Como sindicato cu ta representa e trahadonan nan no por traha contra e trahadonan y e ta haya un tipo di proposicion  aki como anti trahado. “Pa kico mi t’ey anto”, el a bisa.  E ta argumenta cu e no por sali na  vanguardia di e trahadonan y nan famia y di otro banda e ta protagonista di crea desempleo, salario abou  y beneficionan malo. E ta algo inaceptabel pe, mientras cu nos tin un economia cu ta depende principalmente di turismo y casino ta un parti di producto turistico.

E siguiente paso ta cu nan tin cu reuni cu minister bek, mientras cu e abogadonan di ambos parti  ta sigui sinta pa wak si nan por yega na un acuerdo, y FTA tin cu laga e trahadonan tuma cierto decisionnan. Sindicalista Dirksz a bisa cu na final  nan ta dispuesto pa negosha cu e garantia cu e trahadonan ta haya su salario di tres luna cu nan tin sin entrada, a lo menos cu nan por haya algo. E di dos punto di salida ta pa garantisa cu e mayoria di e trahadonan di  casino aki lo tin trabou cerca e operado nobo di e casino. “Esey nos kier”, el a bisa.