Presidente di sindicato FTA, Hubert Dirksz ta declara na Bon Dia Aruba cu despues cu a keda conoci e resultado di e referendum di diabierna ultimo caminda FTA a haya representacion di e trahadonan di TeleAruba, nan ta inicia cu e proceso di negociacion di un contracto colectivo (CAO).
El a bisa cu FTA a traha hopi pa un grupo di trahado di e planta nacional di television cu a dicidi di afilia na e sindicato aki. Awor ta keda pa e sindicato sinta cu gerencia di TeleAruba pa nan cuminsa atende na prome luga cu e problemanan di e trahadonan. Esaki segun e protocol cu nan a firma un par di dianan pasa. Tambe FTA tin cu nombra e representante di e grupo di trahadonan di TeleAruba pa conhuntamente nan ta prepara pa e negociacion di e CAO.
Considerando cu e grupo di trahadonan aki afilia na FTA ta hopi chikito y cu e sindicato ta conoce caba e situacion laboral, nan ta bay trata pa yega na un proposicion pa negocia e CAO. Lider di FTA ta kere cu e proceso aki lo por bay lihe mas of menos den dos pa tres luna, si ta existi boluntad di tur dos banda.
