Segun presidente di FTA Hubert Dirkzs, e proximo gobierno su reto lo ta grandi. FTA ta kere cu e reto mas grandi ta e financiero. “E situacion financiero di pais Aruba ta hopi dificil”, segun e lider sindical. E ta kere cu e aspecto aki sigur lo tin su impacto riba e tereno economico y social.
Sr. Dirkzs ta kere cu e riba e tereno social lo bay sinti e efecto financiero di nos pais hopi directo. Pero e tereno economico tambe ta bay resulta afecta fuerte. “No ta bon pa e pais. Nos ta den un situacion hopi dificil. Nos mester atende cu nos realidad nan manera e ta awe, pa nos den berdad tin nos situacion na ordo”, segun e presidente di FTA.
Igualmente el a haci referencia na e parti di bon gobernacion y corupcion nan cu a bin tumando luga, caminda tin investigacion, detencion, etc.. Segun e, nos sistema di control mester funciona bon pa evita desviacion di e ley, desviacion di etica y moral den aparato gubernamental, den gobierno y den parlamento, y mester para esey definitivamente.
E sindicalista ta felicita nos pueblo cu a haci uzo di nan derecho pa bay vota diabierna ultimo. E sindicalista a indica cu eleccion ta un proceso democratico cu ainda tin paisnan na mundo cu no ta conoce of cu no ta cumpliendo manera mester ta.
“Esey ta un beneficio cu nos tin. E ta un derecho y un caminda cu nos tin habri pa nos eherce nos bos, nos pensamento, nos preocupacion, nos apoyo, na e dirigentenan cu ta pone nan mes disponibel pa maneha e pais aki”, el a bisa.
Sindicato FTA ta pensa pa loke ta diferente aspecto cu mester di atencion den nos pais a wordo teni na consideracion pa cada un di e votadonan. Entre otro situacion laboral, situacion financiero, economico, social y situacion di nos relacion den reino.
Otro aspecto tin di haber cu e situacion di e inmigrantenan y tur esaki mester a wordo poni den consideracion na momento di eherce e derecho di voto pa pone e calidad mas halto den parlamento y na su turno den gobierno.
