FTA: Flexibilidad laboral ta stimula ‘cheap labor’

Flexibilidad laboral ta un tema cu sindicato FTA ta considera cu mester wordo atendi den seno di e reunion tripartiet entre Gobierno, gremio di dunado di trabao y gremio sindical.

Unabes cu cada un di e partinan aki ta bin cu nan posicion nan mester bay den congreso di tripartiet pa e decision wordo tuma, esta kico ta bira e cambionan. Na medida cu ta bin cambio, nan ta bira parti di un di e reforma proponi den e landspakket.

FTA ta haya cu e contracto di corta duracion ta un problema pa e clase trahado. E tin di haci cu e ley 1613X cu e companianan kier pa elimin’e, ya cu nan kier haya e flexibilidad laboral. Pa FTA e flexibilidad aki ta encera cu nan kier pone nan personal traha e cantidad di ora cu e dunado di trabao kier pa e salario cu nan kier, y sin condicion.

“Ora cu tin trabao mi ta yama bo, y ora cu no tin trabao keda na bo cas,” segun presidente di FTA, Hubert Dirksz.

E ta haya cu e tipo di flexibilidad aki no ta crea motibo pa tin un empleo. P’esey e sindicalista su opinion ta cu e interes pa tin un economia draai y empleo, no mester ta na beneficio di e inversionista so. Pasobra bo ta bay tin un economia cu ta draai pa stimula pobresa y economia informal, locual e sindicalista no ta kere cu esey ta e balans. E pregunta ta – segun presidente FTA – kico realmente e inversionista kier? “Bo kier gana placa so. Pero kico ta para di bo producto!” el a declara.

E ta haya cu e doño di compania por kies pa importa trahado stranhero so, pasobra eynan bo por aplica cheap labor. Tin biaha e trahado stranhero no ta conoce nos ley laboral y nan derecho como trahado tampoco. Of si nan ta conoce nos ley laboral y nan derecho mes, nan ta sucumbi pa e situacion cu nan ta aden. “Nan kier un salario y nan no kier bolbe na nan pais back,” segun sindicalista Dirksz.

Den e caso aki, presidente di FTA ta haya cu nos no mester permiti un economia cu ta draai riba inhusticia tampoco. Pero si e ta considera importante cu independiente di e proposicion di e dunado di trabao, FTA ta dispuesto pa bay den dialogo.

Igualmente e ta haya cu por ehempel e peticionnan na Comision di Retiro di Departamento di Labor (DAO) pa duna conseho, ta algo cu por keda y mester keda. Kiermen e director di un compania por tuma un decision a base di e conseho di e Comision di Retiro si ta duna permiso pa termina relacion di trabao si of no.

Independiente di nan posicion riba flexibilidad laboral y eliminacion di e ley 1613X, FTA ta haya cu e procedura di solicitud di retiro di trahado por bay mas rapido y eficiente den e Comision di Retiro, y e ta na su luga. Pero pa hiba e maneho aki no mester cambia e ley, sino gewoon acelera e procedura of maneho. Y si tin necesidad di cambia e ley mes, nan tin como sindicato cu evalua esey, y asina conhuntamente tuma un decision den seno di reunion tripartiet.