Ya nos ta 7 luna leu y no a tende nada ainda ki dia, ki ora y ki momento e casino situa den Occidental Hotel lo habri y esey a trece un mal contento entre e trahadonan cu keto bay ta den un incertidumbre.
Segun presidente di FTA, Hubert Dirksz, e situacion di e reapertura di e casino a dura asina hopi. Despues cu informacionnan a sali a yega cerca e trahadonan, cu e fecha final tabata dia 30 di juni y no tin nada concreto.
Di berdad partidonan ta discutiendo y ta tratando pa yega na halto, pero e mesun deliberacionnan aki a bin ta tuma luga 7 luna largo. Te cu awor aki no tin nada y e trahadonan kier yega na algo. No por sigui asina, no por sigui tuma un posicion cu segun nan, di parti di hotel y di Gobierno ta uno iresponsabel. Nan no ta haya cu suficiente esfuerso ta wordo haci pa yega na un solucion.
FTA ta na mesa y ta trata, mediador di su banda tambe a trata den varios ocasion pa yega na algo y por mir’e mesun cerca y mesun leu. Un dia ta mira cu ta bay yega na algo. Por mira cu lo por tin un acuerdo, pero na e mesun momento e dianan ta pasa y no ta yega na un acuerdo. Esey ta e informacion cu ta yega cerca e trahadonan y nan ta bisa ta basta y ta protesta, pasobra nan kier haya un acuerdo. Nan kier haya placa por lo menos di e debe cu tin na e trahadonan, cu ta di 6 pa 7 luna. Tambe un trabao pasobra awendia, un trabao ta hopi importante y e trahadonan aki a traha den mundo di casino. No ta sin mas ta haya un otro trabao.
E trahadonan aki ta mustra nan mal contento y ta spera cu tanto di parti di Barcelo y e interesadonan pa yega na un operacion nobo y gobierno wak esaki y tuma esaki berdad na serio y haci algo mas pronto cu ta posibel.
Awor aki ta spera si di haya atencion. Ultimo biaha cu tabata tin contacto cu e grupo interesa, tabata siman cu a pasa y a keda di haya un contesta y no a ricibi esaki y te cu diamars ainda no a haya contesta di parti di e abogadonan. Tampoco di parti di Gobierno no a haya un contesta, den sentido kico lo wordo haci. Sa cu Gobierno kisas no tin mucho di haci, pasobra no ta e ta bay habri e casino, sino e interesado nobo ta bay habri e casino. Por lo menos esey ta intencion. Sa tambe cu esun cu tin e licencia, ta esun di mas responsabel. Si tin un licencia, bo tin un casino drecha cla pa habri, kico ta e motibo cu ta tarda asina hopi. Mas dura, mas e debe crece, cu ta cada dia cu pasa, ta un dia di trabao.
Mientras tanto, remodelacion a tuma luga den e casino y segun cu tin entendi, e ta den bon condicion. E ta ideal pa draai y por trece actividad den e casino, Dirksz a bisa por ultimo.
