FTA ta considera cu Dia di Obrero ta un fecha hopi importante. Apesar cu e ta un dia cu ta wordo celebra tur aña riba e mesun fecha, e ta un dia cu ta invita tur hende pa recorda y conmemora cu e logronan cu e clase trahadonan ta gosa di dje awendia, ta luchanan grandi a wordo hiba pa logra nan cu hopi sacrificio hasta di bidanan.

Presidente di FTA, Hubert Dirksz a declara na Bon Dia Aruba cu e fecha emblematico di 1 mei 1886 tabatin hendenan cu a sacrifica nan bida riba plaza Haymarket na Chicago. Nan a lucha pa trato hunto y pa 8 ora di trabou, entre otro logronan. “Door di nan lucha nan a wordo mata.”

Sinembargo e ta haya cu awe ainda e trahadonan tin cu lucha hopi biaha pa e mesun cos cu e martirnan aki a lucha 132 aña pasa. E ta algo lamentabel cu e por ta asina, sigur na Aruba cu tin leynan Hulandes cu ta duna bo hopi beneficio, pero tin ainda ‘practica anti-sindical’.

Nan di FTA ta consciente cu no tur trahado ta ‘santo’ y cu nan mester cumpli cu e deber y derechonan cu nan tin. Pero sigur pa loke ta trata e derechonan laboral na Aruba, FTA ta manda un mensahe pa nos clase trahado pa sali dilanti y pa nan ta mas skerpi, y para pa nan derechonan. Nan tin caminda pa cana, nan por busca nan derecho na departamento di Labor of cerca un sindicato. “Haci esfuerso pa bo wordo respeta y si bo no tin sindicato, afilia bo mes na un sindicato”, el a bisa.

Algun preocupacion
Na Aruba un preocupacion cu FTA a trece dilanti tin di haber cu un desempleo permanente y halto. Di otro banda tin e problema di subcontratacion caminda e trahadonan pa hopi aña ta keda traha bou contract, ya sea directamente of via un uitzendbureau. E ta un practica conoci na Spaño como ‘tercerizacion’ cu bo no ta emplea e persona directamente den servicio. Mas cu tin departamento di Labor cu mester controla e practica aki ya cu e ta ilegal, pero toch e ta sigui pasa sin control di e departamento menciona, segun presidente di FTA.

Tambe e sindicato aki ta haya cu den hopi sector nan no ta mira un desaroyo manera mester ta. E sector di construccion a cay hopi, ya cu no tin mucho construccion. Pero di otro banda ta existi e preocupacion cu si bin construccion hopi grandi cu ta pone un presion riba e forsa laboral, esaki lo por afecta nos mercado, ya cu mester importa trahadonan di afo. Igualmente nan sa cu comercio a sufri hopi durante e ultimo temponan ya cu nan a experiencia un caida den nan actividad.

Igualmente tin situacion caminda si e trahadonan no ta lucha y no ta para pa nan derecho, nan ta cay atras facilmente. FTA ta kere cu conhuntamente e trahadonan mester ta mas consciente y laga para pa nan derechonan.

Sindicalista Dirksz ta haya cu ta importante pa husticia prevalece, muy specialmente husticia social, ya cu como trahado si bo no ta traha e compania no por tin bienestar. Y e bienestar aki no solamente mester ta pa e inversionista sino pa esunnan cu ta produci, pe y su famia.

FTA ta desea pa cada un trahado por pasa un Dia di Obrero agradabel, pero tambe un dia di reflexion. Sin perde di bista cu bo trabou ta ‘bal hopi, respete. Cumpli cu bo deber y exigi bo derechonan’.