FTA a duna bonbini na trahadonan di aeropuerto durante prome reunion

Manera ta conoci, dia 27 di augustus pasa a tuma luga e referendum solicita di banda di e trahadonan di Aruba Airport Authority pa cambia di representacion sindical y den cual e Federacion di Trahadonan a gana cu 93 voto di 104 empleado. Ayera a celebra e prome reunion entre nan, pa cuminsa cu e plan di defensa di e empleadonan den nan asuntonan laboral.

Den e prome reunion aki di bonbini pa tur e empleadonan di banda di FTA, Presidente Hubert Dirksz, Vice-Presidente y abogado Hose Figaroa, hunto cu Tyrone Bremo di departamento pa atende keho, a ofrece palabra pa e assistentnan pa loke ta trata e organisacion na cual awor nan ta pertenece, con e presentacion di FTA cu nan ta y eleccion proximo di e candidatonan pa shop steward.

Dirksz a expresa cu nan tin cu bay sinta na mesa pa establece un relacion entre trahadonan y gerencia, y asina tambe FTA cu gerencia. Nan por opta pa firma un protocol of nan por bay di biaha despues di consulta cu tur e trahadonan tocante ki problemanan nan tin y asina manda un proposicion pa cuminsa negocia un contracto colectivo nobo.

“Como organisacion sindical, nos tin e deber di duna boso e trankilidad na pia di trabou” Dirksz a manifesta.

Ademas, el a bisa cu e shop steward y trahadonan mester ta consciente pa nan por soluciona e problemanan y depende di ki tipo di problema, e ora ey nan mester sa y mester tin un tiki conocemento di ley, cu nan lo bay haya via training, charla y cursonan.

Dirksz a comenta cu loke nan kier logra ta pa trece stabilidad pa tempo largo na A.A.A. Asina mes el a sigura cu tambe nan sa cu tin otro sindicato cu no ta contento cu e presencia di FTA eynan pero, ‘loke nos kier haci ta nos trabou y nos ta percura pa esey tuma luga”, Dirksz a señala.

El a informa cu aworaki e departamento localmente ta tratando caminda pa ora ta necesario pa bay den exterior pa haya preparacion. FTA ta bay manda e shop steward den exterior, pa asina nan por haya e preparacion cu nan mester tin pa ahusta pa e retonan cu por tin den medida cu tempo lo pasa.

Di su banda, e Vice-Presidente y abogado Hose Figaroa a splica cu e trahadonan mester presenta nan candidatonan pa shop steward, cu na final di dia na base di votacion nan mester vota pa wak ken ta bira e delegadonan di e empresa y despues di esey ta cuminsa un proceso cu nan ta yama ‘proceso di formacion’, pa forma e delegadonan ey pa por cumpli cu nan responsabilidad.

Figaroa a bisa cu probablemente e prome contacto cu trahadonan lo por tin cu FTA lo tuma luga e proximo lunanan pa e parti di negociacion, pero esey no ta tur loke FTA ta haci. E servicio ta pa deal cu tur e problemanan cu por surgi na pia di trabou.

Na final di reunion, e trahadonan di A.A.A tambe a haya e oportunidad di haci nan preguntanan tocante e miembresia, e cantidad di shop steward cu nan mester scoge y entre otro, e beneficionan secundario cu e trahadonan lo haya ora di negocia e CAO, por ehempel, cambionan di ley, pa asina evita firma algo cu no ta bon.